Hoxe en día non resulta difícil atopar calquera produto, froita ou alimento doutros países en calquera tenda, froitería ou grande superficie. Isto que para algún a priori pode ser algo bo agocha unha realidade moito máis dura, a dos/as produtores/as. Sexan estes produtores locais ou foráneos ambos os dous sofren as consecuencias do Deus mercado, baixos prezos en orixe e grandes beneficios para os intermendiarios, provocando a precariedade na vida dos produtores e como consecuencia o abandono do rural.Fronte a estas políticas mercantilistas que gobernan e tiran un grande lucro da nosa alimentación grupos de produtores están a agruparse para traballar polo que se coñece como soberanía alimentar, o dereito que teñen todos os pobos para decidir as súas políticas alimentarias. Tamén son moitos/as os/as cidadáns/ás que concienciados/as se agrupan dacordo con produtores locais para formar cooperativas de consumo responsábel.
Alén das consecuencias económicas para os produtores o cultivo intensivo e o uso de abonos químicos xunto coa plantación de produtos transxénicos están a influir de xeito grave no medio. Para coñecer máis sobre a soberanía alimentar e o consumo responsábel, este venres 10 de decembro a partir das 20h na biblioteca municipal de Marín a A.C. Almuinha organiza unha charla coloquio onde intervirán a líder histórica do Sindicato Labrego Galego, Lidia Senra, e unha persoa que forma parte da cooperativa de consumo responsábel e ecolóxico a Gradicela.
Sem comentários:
Enviar um comentário