FORA TOURADAS DA GALIZA !!

A A.C. Almuinha quer manifestar todo o seu apoio às acções que se estám a desenvolver na comarca de Ponte Vedra em contra da celebraçom das touradas.

Todos os anos dúzias de touros som torturados perto de nós, em nome de uma suposta tradiçom que nos é totalmente alheia, que insiste em persistir no sofrimento e posterior morte destes animais. A tauromaquia é umha actividade de culto do sangue e da violência sobre os animais e nada justifica manter na Galiza umha actividade que foge de todo razoamento ético, ao basear-se no sangue e nas posturas sociais e ideológicas mais retrógadas que simplesmente se dedicam a imitar o folclore espanhol sem qualquer espírito crítico.

Por isso Almuinha exige junto à Coordenadora:

1º- Cese imediato de ajudas públicas às touradas.

2º- Exigir à Junta da Galiza a aprovaçom dumha Lei de Protecçom Animal que proiba as touradas.

3º- A declaraçom de todos os Concelhos da Comarca como “livres de touradas”. Polo que a Almuinha apresentou no dia de hoje no registo do Concelho de Marim umha solicitude para que Marim seja declarado “Concelho Anti-touradas”.

Por todo isto, o dia 1 de agosto às 19 horas a Almuinha convida a todos/as os/as sócios/as e amigos/as a estar na Praça da Peregrina de Ponte Vedra para reclamar junto com a Coordenadora Anti-touradas de Ponte Vedra e demais colectivos sociais, culturais e ambientais o cese na Galiza desta manifestaçom de horror e sangue.

Na nossa luita diária por umha sociedade galega mais justa e evoluída nom há lugar para a crueldade na Praça de Touros de Ponte Vedra.

TOD@S A COMPOSTELA ESTE DIA DA PÁTRIA !!

O próximo sábado 25 celebramos o Dia da Pátria 2009.

Desde Almuinha animamos-vos a que, cada quem e, segundo as suas próprias preferências, participedes nalgumha das diferentes convocatórias lúdico-reivindicativas que som anunciadas ao efeito. Concertos e manifestaçons entre os dias 24 e 25 som os actos que reunirám a maior parte dos nacionalistas nas ruas da capital.

Vémo-nos em Compostela !!!

Romaria da Pátria 2009: jantar e navigar !!

Com motivo do 25 de julho, Dia da Pátria, o vindeiro sábado 18 de julho a A.C. Almuinha em colaboraçom com a A.C. Ronsel organizamos várias actividades.

A partir das 14:00 terá lugar um jantar, cujo preço é de 10 euros, e pola tarde está organizada umha saída pola ría em várias embarcaçons tradicionais da A.C. Ronsel a partir das 16:30. Para participar nestas actividades é preciso apontar-se previamente no correio da A.C. Almuinha ou no telefone 677 049 789.

Com estas actividades pretendemos conmemorar esta data especial no calendário do país, gozando de um dia de confraternizaçom e em contacto com o nosso contorno natural, desta volta gozando da nossa ria e do nosso mar, ao tempo que promovendo actividades como a vela tradicional.

CONVOCAMOS ASSEMBLEIA DA LÍNGUA DE MARIM PARA O 24J, 20.15 h

Este é o escrito que enviamos a distintas associaçons e colectivos de Marim:

"Caros amigos/as:

Todos nós fomos testemunhas dos ataques que a nossa língua sofreu, sobretudo durante este último ano, por parte do sector mais espanholista da nossa sociedade. Agora esses mesmos personagens som os responsáveis de gerir a Junta da Galiza e ameaçam com eliminar a escassa protecçom jurídica e a utilidade social com a que contava o galego.

Sobre um falso chamamento à liberdade individual na escolha da língua, que só agocha trás a sua máscara de bilingüismo a defesa da superioridade do espanhol e a procura da erradicaçom da nossa língua dos lugares públicos; temos a certeza que durante estes próximos anos vamos assistir à persecuçom mais grave que nunca tenha existido na história em contra da nossa língua, cultura e identidade nacional.

Perante esta situaçom a A. C. Almuinha quer chamar à mobilizaçom activa em defesa do idioma no Concelho de Marim; é por isso que vos queremos convocar a umha primeira reuniom a todas as pessoas e organizaçons sociais, culturais, desportivas, sindicais e políticas que estades comprometidas em qualquer grao com a defesa e dignificaçom da nossa língua. O nosso objectivo é poder assim coordenar as nossas vozes e incrementar a repercussom social do nosso discurso na vila contrarrestando as mentiras bilingües.

Para isto esperamos-vos a quarta-feira (mércores) dia 24 de Junho, às 20:15, na Biblioteca Pública de Marim.

Marim, 15 de Junho de 2009"

RETIRADA DA SIMBOLOGIA FRANQUISTA DE MARIM

Apresentamos escrito no Concelho dirigido ao Presidente da Câmara Municipal solicitando que se comprometa nas gestons ante o Arcebispado de Compostela para a retirada da simbologia franquista.

A exposiçom do assunto é como segue:

"Que desde a promulgaçom da Lei 52/2007, de 26 de diciembre, pola que se reconhecen e ampliam direitos e se estabelecem medidas em favor de quem padeceu perseguiçom ou violência durante a guerra civil e a ditadura, mais conhecida por “Lei da Memória Histórica”, a Associaçom Cultural Almuinha tem solicitado do Arcebispado de Compostela que gestionara ante os sacerdotes correspondentes a retirada dos ilegítimos símbolos franquistas que continuam a estar expostos no exterior dos templos de Marim.

Embora nos remitiram resposta acusando teres recebido, por parte do Vice-chanceler Secretário do Arcebispado, a nossa solicitude, onde indica que será valorado para posteriormente comunicar-nos as suas conclusons ao respeito, todavia nom temos recebido ditas conclusons.

Ademais sendo testemunhas de que os presidentes da Câmaras Municipais dos Concelhos de Cuntis e Caldas de Reis têm assumido como próprias idénticas reivindicaçons tornando vivo o espírito da Lei referida e obtendo resposta positiva das autoridades eclesiásticas,"

Tras o que solicitamos:

"Que tenha a bem intemediar ante o Arcebispado para conseguir o fim proposto de retirada da simbologia pre-constitucional nomeadamente pensando no sufrimento que, todavía hoje, está a provocar a sua contemplaçom nas paredes das Igrejas de Marim, por parte de quem garda nas suas consciências a lembrança do sufrimento em si próprio, ou nos seus achegados, das consequências da barbárie violenta dos que se erguerom ilegalmente contra a orde jurídica-institucional vigorante na altura e mantiveram a Galiza em um estado de guerra e posterior falta de liberdades, opressom e terror.

A nossa Associaçom oferece a sua colaboraçom à instituiçom que preside para, se o precisar, efectivizar quanto antes umha resposta positiva da Igreja Católica.

Marim, a 18 de junho de 2009"

APOIAMOS MARCHA ANTI-ENCE

A A.C. Almuinha fai público o apoio da nossa associaçom à Marcha convocada pola Asociación pola Defensa da Ría (APDR) para este sábado día 13 de junho, e que partirá às 19:30 desde a Alameda de Marim.

Como cada ano, a sociedade voltará sair à rua a manifestar a disconformidade da inmensa maioría da cidadania com a ubicaçom da factoría no meio da ria e para reclamar o seu peche. Se a Marcha do ano passado veu marcada pola concessom da Autorizaçom Ambiental Integrada (AAI) ao complexo ENCE-ELNOSA, este ano vem marcada polo troco de governo da Junta e a nova situaçom.

Se bem o anterior governo galego deixou bastante que desejar à hora de adoptar medidas reais e efectivas de cara a conseguir que ENCE saia de Lourizám, com a chegada ao governo do Partido Popular (PP), a situaçom resulta quando menos preocupante, posto que a única soluçom que proponhem é o traslado da fábrica dentro da comarca, à paróquia de Marcom, o qual nos parece inaceitável.

Por todo isto, a sociedade marinense tem o dever de sair à rua este sábado mais umha vez para expresar o desejo da ampla maioría da populaçom, que nom é outro que a fábrica desapareza de Lourizám, a regeneraçom da ria, e que esta seja empregada para fomentar outro tipo de emprego e usos em consonáncia com o meio ambiente e com os interesses da maioría da populaçom.

A mobilizaçom é mais precisa ca nunca, posto que nem a própria empresa tem já expectativas de permanéncia na ria num futuro próximo, polo que já estám adicándo-se a investir recursos em outra das suas fábricas, polo que umha resposta forte da sociedade o que provocará será confirmar-lhes aos gestores da fábrica, assi como ao governo galego, que nom queremos esta fábrica em Lourizám. Por todo isto, fazemos um chamamento à mobilizaçom e à participaçom na Marcha, assi como exigimos o feche inmediato da factoria.

SOLICITAMOS PAINÉIS PARA CARTACES AO CONCELHO

A Associaçom Cultural Almuinha como o resto de colectivos e associaçons de Marim necessitamos um suporte para colar os cartaces que informam sobre as nossas actividades. Sendo certo que o Concelho habilitou painéis para a colagem de anúncios ou cartaces em vários bárrios e lugares do meio rural constatamos a sua falha no centro urbano que precissamente é o lugar que concentra mais populaçom polos deslocamentos dos vizinhos do rural para acceder aos distintos serviços que oferece o centro da vila.

Nós desejamos observar e cumprir rigorosamente as ordenanças municipais de meio ambiente ao respeito, e por isto solicitamos mediante um escrito remitido a Dna. Pilar Blanco, concelheira de Meio Ambiente para que tenha a bem ordenar a colocaçom de painéis no casco urbano e possibilitar assi a difussom dos nossos anúncios e do resto de associaçons e entidades marinenses no centro da nossa vila.

Na mesma solicitude propomos vários lugares onde se poderiam colocar dez painéis: Parada de autocarros, na Avda. de Ourense à altura da Biblioteca, nas inmediaçons da Casa do Mar, na Praça de Calvo Sotelo (na encrucilhada com a rúa Jaime Janer), e na Alameda, no Parque Eguren e no Mercado um par de painéis respeitivamente.

Confiamos na resposta positiva do Concelho.

Crónica do roteiro polo Rio da Fraga (Moaña)

O pasado sábado tivo lugar o roteiro polo Rio da Fraga en Moaña, organizado pola A.C. A Ghudalla de Moaña e no que a A.C. Almuinha colaboraba. No mesmo participaron case unha vintena de persoas, que puideron gozar dun día en contacto coa natureza, guiados por un membro do Colectivo Ecoloxista Luita Verde, que foi amenizando o camiño con explicacións sobre a flora e a fauna da zona, así como sobre os usos do chan. Amais, os/as participantes puideron ver en funcionamento un dos moitos muíños que hai polo curso do río, e seguir as explicacións que sobre o seu funcionamento e uso daba unha señora residente da zona. O día rematou cunha cea no Complexo O Beque, que rematou ben entrada a noite.

INTERESSANTE ROTEIRO POR MOANHA ESTE SÁBADO 23

(clicar sobre imagem para ampliar o cartaz)

Este próximo Sábado dia 23 a A.C. Almuinha colabora com a A.C. A Ghudalla de Moanha que organiza um roteiro polo curso do Rio da Fraga (Moanha) até o complexo desportivo municipal do Beque.

A dificuldade do percurso é média-baixa e em conjunto som uns 8 kilómetros com umha duraçom aproximada de cinco horas, incluido o tempo da comida, com o que as únicas recomendações som roupas e botas confortáveis. O roteiro é gratuito mas nom inclue a comida, com o que os parcipantes deverám trazer a sua própria comida e bebida.

Durante o percurso os guias do Colectivo Ecologista Luita Verde comentaram-nos as particularidades da paisagem da zona e pararemos a pôr em marcha um dos moinhos restaurados para moer milho. Pola tarde no cámping do Beque para quem se queira somar haverá umha foliada, jogos tradicionais e possibilidade de acampada com ceia incluida por 10 euros.

Portanto queremos contar com todos os amigos da nossa associaçom nesta actividade ao ar livre. Sairemos desde a Alameda de Marim às 10:30, posto que o roteiro comeza às 11:00 desde o concelho de Moanha.

Mais informaçom em:

http://www.aghudalla.tk/

aghudalla@aghudalla.tk

II FESTA DA LÍNGUA

Este sábado 16 de maio tivo lugar a II Festa da Lingua en Marín. Foi unha Festa marcada polo mal tempo, que provocou que as actividades de todo o día, que estaba previsto tivesen lugar na praza da Veiguiña e o pavillón do Sequelo fosen trasladadas ao pavillón da Cañota.

A partir das 12:30 actuaron o Tear de Llerena, Fentos e Froumas e Nilson cunha actividade de globoflexia. Amais das actuacións repartíronse os libros viaxeiros. Xa as 14:30 tivo lugar o xantar, que este ano reuniu a algo máis de 40 persoas, e que rematou ben entrada a tarde xusto cando as billardas comezaban a soar no pavillón.

No aberto de billarda inscribironse preto dunha trintena de persoas. Os campións foron agasallados con libros cedidos polo xornal Novas da Galiza. Ao remate do campeonato de billarda comezou o Serán, que contou con a presenza de varios grupos de pandereteir@s de Marín, Cela, Pontevedra, A Lama…
A pesar do mal tempo e o cambio de ubicación das actividades, dende Almuinha estamos contentos/as coa participación e asistencia dos e das marinenses nos distintos actos levados a cabo ao longo de todo o día.

Agradecemos-vos a todas e todos os que participastedes na organizaçom, às associaçons, aos grupos e pessoas que actuarom, aos companheiros da Liga Nacional de Bilharda sempre generosos e dispostos a botar umha mao alí onde faga falha, às entidades que patrocinarom os actos com a sua publicidade no cartaz e ao Concelho de Marim, à Gentalha de Compostela e à Amizade, Nova da Galiza e M.D.L. polo material cultural emprestado e a todas e todos os que nos acompanhachedes assitindo às actuaçons ou á comida.

Umha aperta a todas e todos.

16 DE MAIO: II FESTA DA LÍNGUA !

A A.C. Almuinha afronta o vindeiro Dia das Letras, 17 de maio, com a ideia de demostrar que temos umha lingua viva e com futuro. Mas também deve ser um dia de denúncia e reivindicaçom devido à situaçom da lingua galega, em grande perigo ao nom gozarmos @s galeg@s de direitos lingüísticos plenos para desenvolver a nossa vida diária com normalidade.

Como falantes de galego somos discriminad@s e violentad@s dia a dia, por isso reclamamos um estatuto de oficialidade igual ao do castelhano; a obriga de que todo o mundo tenha o dever de conhecer o galego, só nesta situaçom poderemos pensar na sobrevivência do galego.

Desde a A.C. Almuinha pretendemos a aboliçom deste sistema legal que subordina o galego ao castelhano, a aboliçom do supremacismo castelhano e umhas políticas de normalizaçom lingüística ao serviço da nossa sociedade.

O vindeiro sábado dia 16 de maio a A.C. Almuinha organiza a II Festa da Lingua em Marim com motivo do Dia das Letras Galegas. É por isto que queremos convidar-vos a participar das actividades que temos programadas para festejar essa data, e que terám lugar ao longo de todo o dia.

Programaçom:

* Actuaçons na Praça da Veiguinha a partir das 11:00:
- Música tradicional “Tear de Lherena”
- Contacontos “Codia e Miolo”
- Livros viageiros
- Música tradicional “Fentos e Froumas”
- Globoflexia – Contacontos “Nilson”
- Música tradicional “Almuinheira”

* Jantar Popular na Praça da Veiguinha a partir das 14:00.

* Aberto de Bilharda no pavilhom do Sequelo a partir das 18:00.

* Serám na Praça da Veiguinha a partir das 21:00.

Agardamos a tua presença o 16 de maio!

APOIAMOS ACTOS DO DIA DAS LETRAS EM COMPOSTELA

A Associaçom Cultural Almuinha apoia os actos reivindicativos em defesa da nossa língua que terám lugar a manhá do próximo domingo em Compostela com motivo da celebraçom do Dia das Letras.

Animamos-vos a todas e todos para participardes dos mesmos.

Vémo-nos em Compostela !!

RESPOSTA DO ARCEBISPADO

A A. C. Almuinha quer dar a conhecer que temos recebido resposta do Arcebispado de Compostela à nossa solicitude para que gestionaram a retirada dos ilegítimos símbolos franquistas que continuam a estar expostos no exterior dos templos de Marim.

No escrito recebido dam conta da recepçom da nossa solicitude, que será valorada e posteriormente nos comunicarám as suas conclusons.

Porém, a dia de hoje nom temos recebido ditas conclusons. Continuaremos agardando, e reivindicando mentres tanto, que esta solicitude seja tida em conta polas instáncias competentes para a retirada da simbologia franquista.

ANHA URBANA E SERÁM O 25 DE ABRIL

O sábado 25 de abril Almuinha colaborou em 2 actividades de promoçom e difussom da nossa música tradicional.

Pola manhá o grupo de pandereteir@s de Almuinha, junto com a A.C. Tear de Lherena e a A.C. Trépia, tocarom polas ruas de Ponte Vedra a anha. A anha é um item cultural da tradiçom galega enmarcado no ciclo do ano (mês de abril), que admite diversas manifestaçons segundo a tradiçom local do lugar onde se realice. Adoitam ser elementos comúns a todas elas o trabalho colectivo da terra (geralmente em dous bandos ou cabeceiros que competem entre si por rematar primeiro a sua parte da leira), um ramalho de loureiro adoviado para a ocassom (que teoricamente simbolizaria a fertilidade desejada para a terra) e umha execuçom especial para os ritmos tradicionais (utilizando os próprios legons como instrumento). Atopamos este item por toda umha ampla zona da provincia de Ponte Vedra, especialmente nas comarcas de Mondariz, A Paradanta, e chegando incluso até a Terra de Montes. Esta actividade, a anha urbana, supom um intento de recuperaçom social deste item cultural para dá-lo a conhecer à sociedade urbana contemporánea. Resulta umha descontextualizaçom consciente do item, já que se obvia a parte do trabalho da terra para amosar, numha adaptaçom contemporánea, a parte simbólica, musical e expressiva da anha.

E já pola tarde, na Casa de Cultura de Mogor, o nosso grupo de pandereteir@s participou num Serám que tivo lugar a partir das 21:30. Os Seráns som festas participativas que organiza a gente das aldeias no tempo em que nom hai verbenas por ningures, e que comezavam polo serám, à tardinha. Poderiamos dizer que é um “circuito de inverno”, o melhor jeito de ir de festa a tocar, cantar e bailar quando nom hai mais a onde ir (definiçom extraida da web “malmequer”).

REMATA A LNB NA CONFERÊNCIA SUR

O passado 4 de abril tivo lugar em Mos a última jornada da Liga Nacional de Bilharda na Conferência Sur, à qual acodirom 78 palanador@s, conseguindo deste jeito um novo record de participaçom neste primeiro ano de competiçom.
Independentemente dos resultados acadados polas distintas equipas, desde a A.C. Almuinha queremos salientar o enorme sucesso desta primeira tempada do campionato de bilharda na zona sur. Enorme sucesso em quanto à participaçom (155 pessoas e 14 equipas inscritas em polo menos um campionato) e à implicaçom das distintas associaçons e centros sociais que estám a contribuir à recuperaçom e dignificaçom deste jogo tradicional, e sobre todo graças as pessoas que se ocuparom durante todo o ano de coordinar a competiçom, que fizerom um trabalho enorme. Amais criou-se um espaço de interacçom e de companheirismo entre @s componhentes das distintas equipas que fam prever que o sucesso deste ano terá continuidade nos vindeiros anos.
No tocante aos resultados, tras esta jornada, houvo vários trocos nas clasificaçons. O mais salientável da jornada para a Almuinha foi a confirmaçom da clasificaçom entre os oito primeiros postos de Agus e Alberte da nossa equipa (5º e 6º respectivamente), que os clasifica para a Final de Compostela que terá lugar a finais de Maio, na que se mediram @s melhores palanador@s das 3 conferências. Amais Diana rematou no 4º posto da clasificaçom feminina, ainda que empatada com outra jogadora, polo que terá que desputar um desempate para ver se consegue a 4ª praça, que a clasificaria também para a Final. Por equipas, Almuinha rematou no 3º posto, tras os Paquete Pinchas e Faísca, que nos arrebatarom o 2º posto na clasificaçom que tivemos durante todo o ano.
Agora fica agardar a gram Final que terá lugar a finais de maio em Compostela para ver que fam @s noss@s representantes, e ir practicando já para o vindeiro ano nos innumeráveis amigáveis que já estám a organizar-se por moitas vilas e cidades do pais.
Mais info: http://lnbsur.wordpress.com/ e http://ovaral.blogspot.com/

ALBERTE GANHA O ABERTO DE SALCEDA (LNB)

O passado dia 7 de março tivo lugar em Salceda de Caselas a 7ª jornada da LNB, que rematou com o triunfo de Alberte, da Almuinha, que o catapulta até a 4ª praça da classificaçom geral, justo detrás de Agus, também da nossa equipa. Assi as cousas, e a falha de umha so jornada para o remate da Liga, na conferência sul, Agus e Alberte tenhem practicamente garantida a sua presença entre os oito primeiros, o qual supom a sua participaçom na final que terá lugar em Compostela o vindeiro mês de maio, e no que se medirám @s melhores palanador@s das 3 conferências.

Por outra banda, tras esta jornada, a equipa da Almuinha recuperou a segunda praça em solitário, desfazendo o empate a pontos com a equipa do Faísca de Vigo. O desenlace final terá lugar o vindeiro mês de abril com a celebraçom da última jornada da Liga em Mos, que servirá para seleccionar aos/às palanador@s que ocuparám os oito primeiros postos da classificaçom geral, e para ver como remata a clasificaçom por equipas.

Mais info em http://lnbsur.wordpress.com ou http://ovaral.blogspot.com

CEA ANIVERSÁRIO A.C. ALMUINHA

O pasado sábado 14 de febreiro livo lugar a cea coa que a A.C. Almuinha celebrou o seu primeiro aniversário. A cea reuniu a preto de 40 persoas, nunha noite animada na que non faltaron as pandeiretas e o bo ambiente. Cumprimos un ano de traballo satisfeitos/as polo traballo levado a cabo, mais cunha boa cantidade de proxectos en mente e co desexo de que cumpramos moitos máis. Isto non fixo máis que comezar!

Adiante a A.C. Almuinha!!!

REIVINDICACIÓN DIANTE DO CONCELLO

Coincidindo co pleno que tivo lugar o pasado venres 13 de febreiro, e malia a prohibición do Alcalde, a A.C. Almuinha levou a cabo un acto de protesta diante do Concello de Marín. Durante máis de 1 hora permanecimos ás portas do Concello denunciando cunha faixa e panfletos o recurte de liberdades e reivindicando a liberdade de expresión, con motivo da multa imposta por colar cartazes na rúa. Ademais, levamos un peto (porquiño) para que a xente que o desexou puidese colaborar coa Almuinha a reunir os 100 euros da multa.

NON A ARBITRARIEDADE DO CONCELLO!!!

NON AO RECURTE DE LIBERDADES!!!

LIBERDADE DE EXPRESIÓN!!!

ALMUINHA DENÚNCIA AO CONCELHO DE MARIM

Pola comissom da mesma infraçom da Ordenança Geral de Protecçom do Medio Ambiente do Concelho de Marim pola que a nossa associaçom foi multada como ja temos informado.

Temos denunciado ao Concelho com o fim de que seja incoado o correspondente expediente sancionador aos responsáveis pola colada de cartazes anunciadores de distintos actos organizados e/ou patrocinados pola entidade municipal.

Nom íamos ficar silentes ante a arbitrariedade manifesta com que actuou na nossa contra. E para prova dos nossos argumentos aquí vam umha fotinhos dos cartazes cuja colada ficou impune...(para ampliar imagens clickar acima delas).

I ANIVERSÁRIO DE ALMUINHA !!

http://www.acapela.tv/Fish-1-0-bc464641d62d8

A A.C. Almuinha nasceu o 21 de fevereiro do ano 2008 numha assembleia aberta e coa vontade de ser um instrumento plural e aberto para a defesa e promoçom da língua e da cultura galegas, assím como também para a actuaçom e intervençom em diferentes temáticas e ámbitos sociais, como a procura da igualdade plena de todas as pessoas, o fomento de valores solidários e de igualdade entre povos, a defesa e proteçom do meio ambiente, a defesa dos intereses da nossa vila…,todo isto enmarcado desde umha perspectiva de país.

Assím pois e com motivo deste I Aniversario, Almuinha celebrara-ocumha ceia que terá lugar o 14 de fevereiro às 21:30 no Restaurante Sam Giam (Cachupeiro) em Marím.

As pessoas interessadas em assistir devem formalizar a súa reserva com anterioridade no telefone 647062399 ou bem em a.c.almuinha@gmail.com





E que cumpramos moitos mais!!!