dezembro 29, 2015

Visita do Apalpador a Marim

O vindeiro xoves día 31 de decembro o Apalpador visitará Marín outro ano máis. Será a partir das 17:00h. cando percorra as rúas de Marín saudando á rapazada e repartindo doces, acompañado dos seus fieis músicos.

Ás 18:00h. chegará á carpa da Feira de Artesanía, que se atopa na Alameda Rosalía de Castro, onde fará entrega dos premios do Concurso de Debuxos "Debuxando ao Apalpador" (xuntamos as bases no presente correo).
 
Queremos aproveitar para animar aos/ás máis pequenos/as a que leven os seus traballos á carpa até o día 30, onde xa se poden ver un bo feixe de debuxos que están alí expostos, e tamén a que a xente visite a carpa, onde amais de botar unha ollada aos produtos dos diferentes postos da Feira poderán tirarse unha foto facendo de Apalpador cunha imaxe do carboeiro.
 
O Apalpador é unha personaxe mítica galega propia das zonas da alta montaña luguesa (Caurel, Cebreiro, Ancares...). O Apalpador, tamén coñecido como Apalpabarrigas ou Pandigueiro, é un carboeiro que vive nas devesas e caracterízase polo seu grande tamaño, viste boina e traxe esfarrapado e con remendos, fuma en pipa e aliméntase con bagas salvaxes e os porcos que caza no monte.
 
Ao rematar o ano baixa da súa escura morada para ir visitar os nenos e nenas e chega cando estes están durmidos, apálpalles a barriga para ver se están fartos ou se teñen fame. Se están cheos dilles “Así, así esteas todo o ano”, deixándolles unha presa de castañas. No caso de teren fame, fica calado e tamén lles deixa unha presa do froito dos castiñeiros. E tamén deixa algún que outro agasallo...
 
Para tranquilizar aos rapaces e rapazas, bulideiros/as pola inquedanza da chegada do Apalpador, os pais cantábanlles:
 
Vaite logo, meu meniño
marcha agora para a camiña
Que vai vir o Apalpador
a apalparche a barriguiña
Xa chegou o día grande
día do noso Señor.
Xa chegou o día grande
e virá o Apalpador.
Mañá é dia de cachela,
que haberá gran nevarada
e há vir o Apalpador
cunha mega de castañas.
Por aquela cemba
xa ven relumbrando
o señor Apalpador
para darvos o aguinaldo.
 
Hai moitos personaxes polo mundo adiante que traen agasallos aos nenos polo Nadal. Uns están representados como boa xente e outros como “os malos” mais case que todos teñen un tronco común, ben seguro que precristián. Posibelmente a antiga tradición do Apalpador sexa un dos máis antigos vestixios da nosa cultura. E como parte dun patrimonio ameazado debemos esforzarnos por mantelo. 

A.C. Almuinha / A.C.D. O Gharaboto / Asociación de Artesáns de Marín

I Concurso "Debuxando ao Apalpador"

Bases do I Concurso "Debuxando ao Apalpador":

1.­ Os debuxos deberán versar sobre a figura do Apalpador, e levará un lema escrito en galego.
2.­ Haberá tres categorías. Unha primeira para nenos/as entre 3 e 5 anos. A segunda para nenos/as
con idades entre 6 e 8. E a terceira será para nenos/as entre 9 e 12 anos.
3.­ Para poder participar no concurso, cada neno/a deberá presentar un deseño orixinal, con
calquera material ou técnica, relativo á figura do Apalpador. O deseño será presentado nunha folla
de papel ou cartolina de tamaño A4.
4.­ Entregaranse 20 premios, repartíndose entre as 3 categorías.
5.­ Os traballos terán que ser entregados antes do 30 de decembro de 2015 na Carpa da Feira de
Artesanía, na Alameda Rosalía de Castro de Marín. Os debuxos serán expostos na Carpa desde o
momento da entrega.
6.­ Para identificar os traballos, na parte de atrás dos debuxos deberá constar o nome e apelidos do
autor, así como a súa idade.
7.­ O xurado estará composto por 4 persoas: unha da A.C.D. O Gharaboto, outra da A.C.
Almuinha, outra da Asociación de Artesáns de Marín e o propio Apalpador.
8.­ O veredicto do xurado darase a coñecer e os premios entregados polo propio Apalpador o día
31 de decembro ás 18:00h. na Carpa da Feira de Artesanía, na Alameda Rosalía de Castro de
Marín.
9.­ A participación no concurso supón a autorización expresa para a difusión das imaxes.
10.­ A participación no concurso supón a aceptación de todas e cada unha das presentes bases, así
como o criterio das 3 entidades organizadoras da actividade na resolución de calquera cuestión non
prevista nestas bases.

dezembro 21, 2015

O Apalpador chega a Marim!!!

Outro ano máis o Apalpador volta a Marín!!!  


Este ano organizado entre varias entidades, A.C. Almuinha, A.C.D. Gharaboto e a Asociación Marinense de Artesáns, Apalpador xa pasou pola escola do Carballal. 


E para ir quentando motores ante a chegada a nosa vila do Apalpador o vindeiro 31 de decembro, este ano organizamos o I Concurso de debuxo "Debuxando ao Apalpador" para os/as máis cativos/as.


Animádevos!!! Pois haberá un bo feixe de agasallos!!!




dezembro 14, 2015

O Goberno do PP, pola discriminación lingüística

O GOVERNO MUNICIPAL DE MARÍN, DO PP, NÉGASE A ENVIAR UNHA QUEIXA Á IGREXA CON MOTIVO DA NEGATIVA DE DOUS PÁRROCOS DE MARÍN A CELEBRAR EN GALEGO A MISA DO ANIVERSARIO DO PASAMENTO DO PAI PAÚL FRANCISCO CARBALLO.

Desde a A.C. Almuinha queremos manifestar o noso malestar ante a actitude manifestada no pasado Pleno municipal, celebrado o pasado mércores día 9 de decembro, pola Alcaldesa de Marín, e por extensión polo governo municipal do PP, ao tratar esta cuestión.

Ante a petici...ón de que o Concello de Marín enviara unha queixa á Igrexa pola vulneración dos dereitos lingüísticos dunha parte importante da poboación, a Sra. Alcaldesa respostou cunha negativa alegando que só faltaría, que o Concello de Marín non ten potestade sobre a Igrexa.

Iso xa o sabemos todos/as, mais o Concello é a institución que nos representa a todos/as os/as marinenses, polo que cando os direitos de calquera veciño/a son vulnerados, como nesta ocasión, por suposto que ten o dereito e capacidade para enviar unha queixa a quen cometeu esa vulneración de dereitos.

Cremos que neste caso se manifesta con total claridade que as boas palabras manifestadas en moitas ocasións polo PP en canto á lingua galega non se corresponden coa realidade. A realidade é que desde o PP vese a cuestión do galego como unha cuestión secundaria, sen moita importancia, que os leva a apoiar algunha moción como as presentadas no pasado Pleno Municipal a prol da lingua, en outras moitas ocasións non, ou a asistir a algún acto a prol do galego, mais continúan amosando unha falta de sensibilidade cara a mesma que se manifesta nunha falta de compromiso real.

A Igrexa de Marín, contra o galego



A A.C. Almuinha ven de enviar unha queixa, que xuntamos neste entrada, dirixida ao Arcebispo de Santiago de Compostela con motivo da negativa de dous párrocos de Marín a celebrar en galego a misa do aniversario do pasamento do Pai Paúl Francisco Carballo.

Mais tamén queremos aproveitar para manifestar o noso malestar ante a actitude manifestada no pasado Pleno municipal, celebrado o pasado mércores día 9 de decembro, pola Alcaldesa de Marín, e por extensión polo governo municipal do PP, ao tratar esta cuestión.

Ante a petición de que o Concello de Marín enviara unha queixa á Igrexa pola vulneración dos dereitos lingüísticos dunha parte importante da poboación, a Sra. Alcaldesa respostou cunha negativa alegando que só faltaría, que o Concello de Marín non ten potestade sobre a Igrexa.

Iso xa o sabemos todos/as, mais o Concello é a institución que nos representa a todos/as os/as marinenses, polo que cando os direitos de calquera veciño/a son vulnerados, como nesta ocasión, por suposto que ten o dereito e capacidade para enviar unha queixa a quen cometeu esa vulneración de dereitos.

Cremos que neste caso se manifesta con total claridade que as boas palabras manifestadas en moitas ocasións polo PP en canto á lingua galega non se corresponden coa realidade. A realidade é que desde o PP vese a cuestión do galego como unha cuestión secundaria, sen moita importancia, que os leva a apoiar algunha moción como as presentadas no pasado Pleno Municipal a prol da lingua, en outras moitas ocasións non, ou a asistir a algún acto a prol do galego, mais continúan amosando unha falta de sensibilidade cara a mesma que se manifesta nunha falta de compromiso real.


A/A ARCEBISPO DE SANTIAGO DE COMPOSTELA, D. JULIÁN BARRIO BARRIO

A.C. Almuinha

EXPÓN
Que nos pasados días fomos testemuñas duns feitos absolutamente inaceptábeis na vila de Marín pola negativa de dous párrocos a celebrar en galego a misa do aniversario do pasamento do Pai Paúl Francisco Carballo, o que constitúe unha clara vulneración dos dereitos lingüísticos dunha parte moi importante da poboación galega.

Consideramos que a simple negativa constitúe unha falta de respecto tanto cara ás persoas solicitantes do oficio, como cara as que empregamos o galego na nosa vida cotiá, unha parte moi importante da poboación da Galiza e da nosa vila, como cara a memoria do Pai Paúl Francisco Carballo, firme defensor da lingua galega.

Mais o máis grave da cuestión foron as palabras e as formas empregadas para expresar tal negativa, amosando un desprezo absoluto pola lingua galega e as persoas galegofalantes que non se pode pasar por alto.

Desde a A.C. Almuinha celebramos que finalmente a misa vaia ter lugar atendendo aos desexos das persoas solicitantes e aos propios desexos do Pai Paúl Francisco Carballo, que estamos seguros irían neste sentido dada a súa traxectoria, pensamento e acción de firme compromiso coa lingua galega.

Mais aínda así queremos expresar a nosa queixa ante o comportamento inaceptábel dos dous párrocos, José Antonio Pedrosa (párroco de San Xulián) e Fernando Chacón (párroco de Santa María do Porto de Marín).

O galego é a lingua propia da Galiza, utilizada na nosa Terra desde hai máis de mil anos por moitas xeracións de galegos/as, é a maior obra criada polo pobo galego ao longo da historia e o noso maior patrimonio.

Nas últimas décadas estamos a asistir a un proceso de substitución do galego polo castelán, que está a ser moi efectivo pois está a conseguir reducir cada vez máis a presenza do galego en todos os ámbitos, e os últimos estudos sobre o uso do galego corroboran estas palabras, polo que cremos que só o compromiso de todos/as coa lingua pode garantir o seu futuro,

POLO QUE SOLICITA

1.- Que feitos como estes que denunciamos non se volten producir.

2.- Que a Igrexa adopte un papel positivo e activo cara a lingua galega, favorábel ao proceso de normalización do galego, e que aporte o seu graniño de área para reverter a tendencia que amosan todos os estudos e que nos últimos meses fixeron acender todas as alarmas en canto á supervivencia da nosa lingua se refire.

Marín, a 11 de decembro de 2015