dezembro 29, 2009

31D: Festa no Centro Social !!

Desde a A.C. Almuinha informamos que manhá organizamos umha Festa para receber o novo ano. A Festa terá lugar no nosso Centro Social a partir da 1 da manhá durante toda a noite, e a entrada é de balde. Haverá várias sorpresas, amais de boa música, e a partir das 5 horas oferecemos chocolate quente a tod@s @s que se acheguem ao Centro Social.

Amais de todo isto o C.S. brinda o seu cenário para tod@s aqueles que queiram realizar umha breve actuaçom musical (en acústico), de humor, de baile, etc para dar-se a conhecer podem faze-lo da 1h em diante. O único requisito seria a utilizaçom do galego.

Desde a A.C. Almuinha animamos a todos/as aqueles/as que o desejem a que passem polo nosso centro social, e recebam com nós o novo ano.

Umha aperta.

A.C. Almuinha

Rua Ezequiel Massoni 63, res-do-chao

a.c.almuinha@gmail.com

www.acalmuinha.blogspot.com

Tlf: 677 049 789

dezembro 28, 2009

Documentais e Passagem de Ano no Centro Social


Esta semana imos projectar 2 documentais e um filme no nosso Centro Social a partir das 20:00 horas, e a entrada é de balde.
A segunda-feira (luns) dia 28 projectara-se o documental "Consume hasta morir". Este documental fala de como vivimos expostos a um constante bombardeio publicitário e num mundo onde o obxectivo de toda pessoa que se precie é o consumo desbocado. Se nom se tem necesidade, essa necessidade incluso se creia através da publicidade.
A terça-feira (martes) dia 29 projectara-se o documental "Línguas cruzadas". Este documental expom a realidade lingüística da nossa terra a través da conversa com multutide de rapaces de diferentes vilas do pais.
A quarta-feira (mércores) dia 30 projectara-se o filme "This is England", filme que trata do racismo e a xenofobia.
E o 31 festa da Passagem de Ano com boa música, bom ambiente e algumha que outra surpresa !!!! Vinde tod@as!!!

dezembro 23, 2009

Este sábado Apalpador e concerto no centro social






















O Apalpador, a figura tradicional do nadal galego, sairá este sábado 26 a partir das 17:30 da tarde polas rúas de Marín, acompañado dun grupo de pandereteiros e pandereteiras, para apalparlle a barriga os nenos e nenas, vendo que tal comeron este ano, haberá caramelos, cartas para escribirlle o apalpador pedindo agasallos, e debuxos do Apalpador para colorear.

A partir das 21H do mesmo sábado 26 e con entrada de balde a.c. Almuinha organiza un concerto o centro social situado na rúa Ezequiel Massoni nº 63 baixo, tocará o grupo local Maedi Visna. Do cal podedes saber máis non seu myspace: www.myspace.com/maedivisna

dezembro 19, 2009

Comunicado conjunto A.C. A Revira e A.C. Almuinha


Comunicado conjunto da A.C Almuinha e A.C Revira perante a inauguraçom dos dous centros sociais:
Da A.C Almuinha de Marím e da A.C Revira de Ponte Vedra vimos de anunciar os actos inaugurais dos nossos respectivos novos locais sociais para esta sexta 18 de dezembro.
No caso da Almuínha, depois de quase dous anos em activo e logo dum importante trabalho na área de Marím, decidimos por em andamento o que será a partir de agora o nosso local social, base principal para as nossas actividades. No tocante à Revira, este inverno cumprimos seis anos anunciando a inauguraçom do nosso novo centro social, com energias renovadas e um grupo de sócios/as completamente coesionados/as e com mais vontade de trabalho do que nunca.
Desde as duas associaçons lamentamos a coincidência das datas de apertura , sem dúbida produto da falha de comunicaçom e da actividade intensa que estivemos a desenvolver para termos prontos os nossos centros sociais nas datas mais acaídas, antes do periodo vacacional.
Malia esta circunstáncia, tanto desde a Almuinha como desde a Revira, cientes de formarmos parte de umha área geográfica e sociológica muito próxima , e partilhando objectivos a prol da defesa da nossa língua, do território, e, em fim, da soberania política do povo galego e por um novo sistema económico mais justo, queremos expressar o nosso reconhecimento mútuo e vontade de trabalho común em quantas iniciativas nos for possível.
As assembleias da A.C Revira e da A.C Almuinha, a 17 de decembro de 2009
-----
Comunicado conxunto da A.C Almuinha e A.C Revira perante a inauguración dos dous centros sociais
Da A.C Almuinha de Marín e da A.C Revira de Pontevedra vimos de anunciar os actos inaugurais dos nosos respectivos novos locais sociais para este venres 18 de Decembro.
No caso da Almuinha, despois de case dous anos en activo e logo dun importante traballo na área de Marín, decidimos por en marcha o que será a partir de agora o noso local social, base principal para as nosas actividades. No tocante á Revira, este inverno cumprimos seis anos anunciando a inauguración do noso novo centro social, con enerxías renovadas e un grupo de socios/as completamente coesionados/as e con máis ganas de traballo do que nunca.
Desde as dúas associacións lamentamos a coincidencia das datas de apertura , sen dúbida produto do fallo de comunicación e da actividade intensa que estivemos a desenvolver para termos prontos os nosos centros sociais nas datas máis acaídas, antes do periodo vacacional.
Malia esta circunstancia, tanto desde a Almuinha como desde a Revira, conscientes de formarmos parte de umha área xeográfica e sociolóxica moi próxima , e compartindo obxectivos a prol da defensa da nosa lingua, do territorio, e, en fin, da soberanía política do pobo galego e por un novo sistema económico máis xusto, queremos expresar o noso recoñecemento mutuo e ganas de traballo común en cantas iniciativas nos for posíbel.
As asembleas da A.C Revira e da A.C Almuinha, a 17 de decembro de 2009

dezembro 16, 2009

Inauguraçom do nosso Centro Social esta sexta 18


A A.C. Almuinha quere mediante estas liñas facer público que esta fin de semana inauguramos o noso Centro Social en Marín. A nosa asociación naceu hai case dous anos cuns claros propósitos, defender e potenciar a nosa lingua e cultura e dinamizar a vida cultural en Marín, mais o noso non é só un proxecto cultural, acreditamos nunha transformación social e en que outro mundo non só é posible senón que é necesario e con estas metas desenvolvemos diversas actividades entre as que podemos contar as festas da lingua, magosto, abertos de billarda, charlas, roteiros… Ao comezar a nosa andaina tamén nos púñamos como un obxectivo, aínda que non inmediato mais tampouco moi lonxano no tempo, chegar a ter un Centro Social onde poder desenvolver as nosas actividades e poder ofrecerlle aos veciños e veciñas de Marín un espazo en galego, ao mesmo tempo que conseguir ter un maior contacto coa sociedade, difícil de conseguir sen contar cun espazo físico proprio.

Despois de case un ano buscando o local máis axeitado para nós por fin o atopamos e estamos prontos para comezar a nosa nova andaina. Este novo camiño era un paso necesario non só para crecer como asociación, algo que agardamos, senón tamén para a sociedade marinense e galega en xeral, nestes momentos en que a nosa cultura e lingua están a ser atacadas non só por grupos galegófobos senón tamén polo actual goberno da Xunta, o noso labor é máis importante do que nunca para a sobrevivencia da nosa identidade.

Esta fin de semana iniciamos esta nova andaina, e con tal motivo temos varias actividades programadas. O venres día 18 de decembro a partir das 20:00 horas terá lugar unha charla co título "Centros Sociais na Galiza", na que intervirán representantes de varios centros sociais galegos, como son o C.S. Faísca (Vigo), C.S. Revolta (Vigo), Gentalha do Pichel (Compostela) e un representante da A.C. Almuinha. A continuación haberá unha pequena festa de inauguración con petiscos variados. O sábado día 19 de decembro continuamos as actividades cunha cea (Carne ao caldeiro), cuxo prezo é de 10 euros, e todas aquelas persoas que desexen asistir tan só teñen que comunicalo a través do noso correo electrónico (a.c.almuinha@gmail.com) ou por teléfono (677049789). Todas as actividades son abertas ao público, e terán lugar no Centro Social situado na rúa Ezequiel Massoni nº 63, baixo esquerda. Por último queremos convidar a todos aqueles que o desexen a achegarse ao Centro Social e participar das actividades.

Marín, a 14 de decembro de 2009

A.C. Almuinha
a.c.almuinha@gmail.com
www.acalmuinha.blogspot.com
Tlf: 677 049 789

novembro 19, 2009

Nom aos recheios no Porto de Marim


A A.C. Almuinha quer manifestar a nossa satisfacçom pola resoluçom emitida nos passados dias polo Tribunal Supremo que anula o Plano Especial do Porto de Marim e, consequentemente, declara ilegais os recheios efectuados na ria e ordena a sua retirada.



Desde a nossa associaçom vemos com preocupaçom como se estám a ponher em marcha numerosos projectos de recheios na costa, entre outras actuaçons, que na práctica totalidade dos casos nom tenhem em conta as conseqüencias sobre o meio ambiente e ainda sem ter em consideraçom a legalidade vigente. Som moitos os exemplos a este respeito existentes em concelhos mais ou menos próximos a Marim (Cangas ou Vigo), e esta sentença vem dar a raçom a todas aquelas pessoas e entidades que venhem loitando contra autênticos despropósitos em moitos casos, que sempre procuram o beneficio de intereses privados por riba dos intereses gerais.



Hai que salientar que esta ilegalidade foi autorizada por representantes do PP, partido que dirigia na altura as 3 instituiçons implicadas (Xunta, Deputación e Autoridade Portuaria), e que como noutros casos soe distinguir-se por anteponher os intereses privados em prejuizo dos intereses gerais ou medioambientais, como se está a ver, amais de com os recheios em numerosos lugares com a autorizaçom para a construçom de piscifactorías na costa galega.



Por outra banda, queremos aproveitar para valorar as declaraçons efeituadas nos passados dias polos máximos representantes do PP e do PsdeG na Galiza, Alberto Núñez Feijóo e Manuel Vázquez, assi como da Cámara de Comercio entre outras, a respeito da possibilidade de nom cumprir com a sentença, baséando-se em que a aplicaçom da sentença pode causar mais prejuizos que beneficios. Curioso alegato a favor do incumprimento dumha resoluçom judicial, e a favor das políticas de feitos consumados, sentando um precedente para outros recheios. Mas ainda mais, posto que isto poderia trasladar-se a outros ámbitos, resultando na práctica que primeiro realiza-se umha acçom, alegando a continuaçom, no caso de que seja preciso, que a sua execuçom causa mais prejuizos que beneficios. Resulta incrível que declaraçons deste tipo venham de 2 representantes políticos e máximos representantes do PP e PsdeG.



Por último, temos que felicitar a Plataforma em Defesa da Praça dos Praceres, porque sem a sua constáncia esta sentença nom se teria produzido, e exigimos o cumprimento inmediato da sentença dum jeito respeituoso com a ria, ao tempo que queremos fazer um chamamento a continuar alerta nas agressons nas nossas rias, e nomeadamente contra os recheios.



Marim, a 17 de novembro de 2009

outubro 28, 2009

Magusto, esta sexta feira dia 30 !!!!



Esta sexta feira dia 30 de outubro, a partir das 20:30, a A.C. Almuinha organiza um Magosto na Alameda de Marim. O MagUsto estará acompanhado de um Serám, no que participarám vários grupos de pandereteir@s. A participaçom no Serám, como sempre acontece nestes eventos, é aberta a todos/as aqueles/as que desejem tocar.

O objectivo desta actividade é, amais de passar um bom rato de festa, promover as nossas tradiçons e a nossa cultura, misturando a nossa música com a festa do Magusto, umha festa que se vem celevrando desde hai moitos séculos por todo o pais. É umha festa num tempo reservado a honrar as colheitas, e que tem lugar por toda a Galiza durante os primeiros dias do mês de novembro.

Por último, queremos animar-vos a participar da festa.

Vémo-nos no Magusto!

outubro 22, 2009

ROTEIRO POLA CARBALLEIRA DE COIRO


A Asociación Cultural Almuinha conxuntamente coa Asociación Cultural A Ghudalla e o grupo ecoloxista Luita Verde organizan un roteiro polo carballal de Coiro que terá lugar o vindeiro domingo día 25 con saída dende Ermelo ás 11 da mañá.

O roteiro que trancorrira polo alto da Paralaia, pozo das Cruces, val de Esperón, polo bosque de ribeira do río Bouzós, alto da Esculca para rematar de novo en Ermelo terá unha duración aproximada de 3 horas e é apta para todo o mundo.

O roteiro estará guiado por un membro de Luita Verde que irá explicando aos e ás asistentes a variedade de vexetación e fauna que hai nos distintos lugares por onde discorrera o roteiro.

Hai unha grande parte da poboación que vive de costas á natureza, obviando ou non lle importando o grande valor dos nosos montes, ríos e costas, ese desleixo provoca que administracións e empresas cometan as maiores barbaridades como vías de comunicación ou canteiras que destrozan dun xeito irreparábel o medio, presas ou verquidos que destrúen a riqueza dos nosos ríos ou portos deportivos e recheos que destrozan as nosas costas.

A A.C. Almuinha, consciente do grande valor do medio no que vivimos, pretende dar a coñecer con este roteiro a riqueza natural e cultural do noso entorno e concienciar a poboación da importancia que ten a súa conservación.

Por último, recoméndase ás persoas que queiran participar nesta actividade que dadas as condicións climatolóxicas desta semana leven un calzado cómodo e adecuado para non se mollar os pes, así como roupa de abrigo por se acaso chovera no camiño.

outubro 15, 2009

Apoiamos a manifestación pola língua


Desde a A.C. Almuinha queremos facer público o noso total apoio á manifestación convocada para este domingo, día 18 de outubro, en Compostela en favor da nosa lingua e dos dereitos d@s galegofalantes.


Consideramos que estamos a vivir un momento histórico dunha importancia enorme para a nosa lingua, no que asistimos a un ataque directo e brutal contra a lingua deste país por parte do goberno galego e o partido que o sustenta, que supostamente debera defendelo e promovelo. Observamos, pois, con indignación como @s membros do goberno galego, cada quen na súa área, e outr@s representantes públicos do PP e algún/ha do PSdeG, están dando mostras sobradas de menosprezo nalgúns casos, e de ataque directo noutros. Vemos, por exemplo, como conselleir@s se negan sistematicamente a empregar a lingua deste país, agás cando lles escriben o que teñen que ler, algo do que nos últimos 30 anos non hai constancia n@s representantes polític@s; actitudes hostís que se manifestan a través da eliminación dos limitados avances do anterior goberno da Xunta, tentando por todos os medios que o galego continúe nunha posición de inferioridade con respecto ao castelan no ensino, derrogando o decreto do ensino; a eliminación da obriga de coñecer o galego no acceso á función pública; recurtando as axudas á tradución de libros ao galego ou recurtando de xeito substancial as axudas ao libro escrito en lingua galega. Por se isto non fose dabondo tamén temos os casos de representantes provinciais ou locais que teiman na súa loita contra o galego, abrindo temas supostamente fechados como nomes de cidades, o idioma das administracións ou colaboran financiando integramente actividades de grupos hostís ao galego.


Son tan só uns poucos exemplos da actitude vergoñenta que está a amosar o goberno galego e outr@s representantes públicos do PP, que xa non é que non estea a cumprir coas súas obrigas no que se refire á promoción do galego, senón que están a atacalo de xeito frontal e virulento, seguindo á perfección as directrices marcadas polos grupos galegófobos, que pretenden coas súas solicitudes o enterramento da nosa lingua.


É por todo isto que consideramos fundamental a mobilización e a defensa da nosa lingua en todos os ámbitos. A nosa lingua non deixa de perder falantes, como reflicten todos os estudos. É hora de que a cidadanía resposte a estes ataques, e tome conciencia de que a lingua da nosa terra está recuando a pasos axigantados, fora ou en posición subordinada en todos e cada un dos ámbitos sociais (escola, medios de comunicación, comercio, administración, empresa privada...), e de que ou mudamos as nosas actitudes e pasamos a defender con orgullo a dignidade da nosa lingua ou o galego carece de futuro. É hora de que nos paremos a pensar o que estamos a facer para a nosa lingua perviva. A nosa lingua ten un valor como lingua propia, unha lingua milenaria que é nosa, e tan só por iso xa ten un gran valor, que nos permite comunicarnos entre nós e nos define como colectividade humana diferenciada. Mais ademais permítenos comunicarnos a través do mundo lusófono con máis de 300 millóns de persoas de todo o mundo (Portugal, Brasil, Mozambique, Angola, Timor...), co que o seu valor vese incrementado, e é unha oportunidade que non debemos deixar pasar. Non podemos renunciar a este patrimonio, o maior que temos @s galeg@s, non podemos deixar que esmoreza.


Por todo isto, facemos un chamamento á participación na manifestación da dignidade convocada para este domingo a todos os homes e mulleres da nosa vila, que por riba de diferencias ideolóxicas ou políticas, aman a nosa lingua, para amosar que o pobo galego quere a súa lingua. Mais non consideramos que sexa suficiente e facemos un chamamento máis amplo na defensa e na promoción da nosa lingua no día a día e en todos os ámbitos, que é o realmente importante, o compromiso no día a día. Só coa firmeza na defensa do galego conseguiremos mante-lo vivo e transmiti-lo ás xeracións posteriores. É o noso deber como galeg@s.


Marín, a 15 de outubro de 2009


A.C. Almuinha

a.c.almuinha@gmail.com

www.acalmuinha.blogspot.com

Tlf: 677 049 789

outubro 13, 2009

Cursos 2009/2010



A A.C. Almuinha organiza unha serie de cursos para o ano 2009/2010 cos que pretendemos fomentar o coñecemento e a difusión da música tradicional e da nosa cultura, e que veñen dar continuidade ao traballo feito nos 2 últimos anos nos que xa viñemos ofertando cursos.



Os cursos son os seguintes: pandeireta, gaita, tamboril e baile. O prazo de inscrición é durante todo o mes de outubro, e os horarios serán a convir entre @s alumn@s e @s mestres. Os cursos terán lugar na Casa da Cultura de Mogor.



Para anotarse tan só é preciso poñerse en contacto con nós a través do teléfono 677 049 789 ou no correo (a.c.almuinha@gmail.com).

outubro 04, 2009

Contra a simbologia franquista, imaginaçom


No passado mês de dezembro a A.C. Almuinha remitiu um escrito dirigido ao Arcebispo de Compostela, Monsenhor Julián Barrio Barrio, no que lhe solicitamos a retirada das pracas franquistas que estám colocadas numha das paredes da Igreja Velha da nossa vila.




Consideramos que a nossa solicitude está fundamentada no sentido comúm, nom é lógico que símbolos dum régime dictatorial continuem por mais tempo nas nossas ruas. A sua permanência, mais de 30 anos depois da morte do ditador, constitue umha humilhaçom para todas aquelas pessoas que sufrirom nas suas carnes a repressom e umha burla para qualquer que se considerar minimamente demócrata. A retirada de toda a simbologia franquista deveu ter lugar já nos anos inmediatamente posteriores à morte do ditador.


Mas hoje em dia a lei ampara esta solicitude, posto que a Lei Lei 52/2007 de 26 de decembro, mais conhecida como Lei da Memória Histórica, obriga a retirada de toda a simbologia franquista das ruas.



O certo é que tras a resposta do Arcebispado, a começos desta ano, de que tratariam o assunto, como se pode comprovar nom se tomou nengumha medida. As pracas franquistas continuam no seu lugar.



Ante o passo do tempo, e tendo em conta o comportamento de outros alcaldes de vilas próximas como Cuntis, que se puxo em contacto directamente com o Arcebispado para tratar a retirada da simbologia fascista de umha igreja da sua vila, e conseguiu-no rapidamente, solicitamos-lhe ao Alcalde de Marim o 18 de junho, mediante um escrito, que actua-se e lhe solicita-se ao Arcepispo a retirada destas pracas. Mas polo que sabemos nom fixo nada, o que por outra banda nom deixa de ser curioso que tratándo-se de um Alcalde "socialista" nom faga nada num assunto como este.


Depois de 10 meses nem o Arcebispado de Compostela tomou nengumha medida para a retirada das pracas, nem o Alcalde do nosso concelho moveu um dedo para conseguir a sua retirada. As pracas continúam no seu sitio. Consideramos que nom é justificável desde um ponto de vista democrático a pervivência destes símbolos, que representam um passado obscuro de imposiçom, falta de liberdades, tanto individuais como colectivas, de tortura e repressom. É umha burla para todas as pessoas defensoras da liberdade e de valores democráticos a pervivência destes símbolos nas nossas ruas.


É por todo isto, pola falta de actuaçons dirigidas a retirada destes símbolos, tanto do Arcepispado como do próprio alcalde do nosso concelho, que nos vemos na obriga de precintar simbolicamente a Igreja velha de Marim, solicitando com esta actuaçom a retirada, sem mais demoras, destas pracas.

Marim, a 2 de Outubro de 2009

setembro 18, 2009

ABARRATODA ABERTURA DA LNB-SUL 2009





Oito membros da equipa de bilharda de Almuinha têm participado na apertura da conferência sul da Liga Nacional de Bilharda 2009.


Quase um cento de participantes têm sido incritos no Aberto de Redondela e várias novas equipas têm feito o seu debute.


Por Almuinha foram para terras de Redondela Diana, Lucia, Jurjo, Alberte, Fram, Luis Enrique e Joám e embora tivemos algumha importante aussência, entre os oito participantes, sendo os que despontaram na classificaçom Alberte e mais Luis, conseguimos possicionar a nossa equipa entre as três primeiras neste primeiro aberto da tempada.


De sermos capaces de manter umha certa regularidade poderemos manter a possiçom da nossa equipa em lugar destacado. Assí será !!!!

julho 29, 2009

FORA TOURADAS DA GALIZA !!



A A.C. Almuinha quer manifestar todo o seu apoio às acções que se estám a desenvolver na comarca de Ponte Vedra em contra da celebraçom das touradas.



Todos os anos dúzias de touros som torturados perto de nós, em nome de uma suposta tradiçom que nos é totalmente alheia, que insiste em persistir no sofrimento e posterior morte destes animais. A tauromaquia é umha actividade de culto do sangue e da violência sobre os animais e nada justifica manter na Galiza umha actividade que foge de todo razoamento ético, ao basear-se no sangue e nas posturas sociais e ideológicas mais retrógadas que simplesmente se dedicam a imitar o folclore espanhol sem qualquer espírito crítico.



Por isso Almuinha exige junto à Coordenadora:



1º- Cese imediato de ajudas públicas às touradas.


2º- Exigir à Junta da Galiza a aprovaçom dumha Lei de Protecçom Animal que proiba as touradas.


3º- A declaraçom de todos os Concelhos da Comarca como “livres de touradas”. Polo que a Almuinha apresentou no dia de hoje no registo do Concelho de Marim umha solicitude para que Marim seja declarado “Concelho Anti-touradas”.



Por todo isto, o dia 1 de agosto às 19 horas a Almuinha convida a todos/as os/as sócios/as e amigos/as a estar na Praça da Peregrina de Ponte Vedra para reclamar junto com a Coordenadora Anti-touradas de Ponte Vedra e demais colectivos sociais, culturais e ambientais o cese na Galiza desta manifestaçom de horror e sangue.


Na nossa luita diária por umha sociedade galega mais justa e evoluída nom há lugar para a crueldade na Praça de Touros de Ponte Vedra.

julho 20, 2009

TOD@S A COMPOSTELA ESTE DIA DA PÁTRIA !!


O próximo sábado 25 celebramos o Dia da Pátria 2009.

Desde Almuinha animamos-vos a que, cada quem e, segundo as suas próprias preferências, participedes nalgumha das diferentes convocatórias lúdico-reivindicativas que som anunciadas ao efeito. Concertos e manifestaçons entre os dias 24 e 25 som os actos que reunirám a maior parte dos nacionalistas nas ruas da capital.


Vémo-nos em Compostela !!!

julho 15, 2009

Romaria da Pátria 2009: jantar e navigar !!


Com motivo do 25 de julho, Dia da Pátria, o vindeiro sábado 18 de julho a A.C. Almuinha em colaboraçom com a A.C. Ronsel organizamos várias actividades.

A partir das 14:00 terá lugar um jantar, cujo preço é de 10 euros, e pola tarde está organizada umha saída pola ría em várias embarcaçons tradicionais da A.C. Ronsel a partir das 16:30. Para participar nestas actividades é preciso apontar-se previamente no correio da A.C. Almuinha ou no telefone 677 049 789.

Com estas actividades pretendemos conmemorar esta data especial no calendário do país, gozando de um dia de confraternizaçom e em contacto com o nosso contorno natural, desta volta gozando da nossa ria e do nosso mar, ao tempo que promovendo actividades como a vela tradicional.

junho 19, 2009

CONVOCAMOS ASSEMBLEIA DA LÍNGUA DE MARIM PARA O 24J, 20.15 h

Este é o escrito que enviamos a distintas associaçons e colectivos de Marim:

"Caros amigos/as:

Todos nós fomos testemunhas dos ataques que a nossa língua sofreu, sobretudo durante este último ano, por parte do sector mais espanholista da nossa sociedade. Agora esses mesmos personagens som os responsáveis de gerir a Junta da Galiza e ameaçam com eliminar a escassa protecçom jurídica e a utilidade social com a que contava o galego.

Sobre um falso chamamento à liberdade individual na escolha da língua, que só agocha trás a sua máscara de bilingüismo a defesa da superioridade do espanhol e a procura da erradicaçom da nossa língua dos lugares públicos; temos a certeza que durante estes próximos anos vamos assistir à persecuçom mais grave que nunca tenha existido na história em contra da nossa língua, cultura e identidade nacional.

Perante esta situaçom a A. C. Almuinha quer chamar à mobilizaçom activa em defesa do idioma no Concelho de Marim; é por isso que vos queremos convocar a umha primeira reuniom a todas as pessoas e organizaçons sociais, culturais, desportivas, sindicais e políticas que estades comprometidas em qualquer grao com a defesa e dignificaçom da nossa língua. O nosso objectivo é poder assim coordenar as nossas vozes e incrementar a repercussom social do nosso discurso na vila contrarrestando as mentiras bilingües.

Para isto esperamos-vos a quarta-feira (mércores) dia 24 de Junho, às 20:15, na Biblioteca Pública de Marim.

Marim, 15 de Junho de 2009"

RETIRADA DA SIMBOLOGIA FRANQUISTA DE MARIM

Apresentamos escrito no Concelho dirigido ao Presidente da Câmara Municipal solicitando que se comprometa nas gestons ante o Arcebispado de Compostela para a retirada da simbologia franquista.

A exposiçom do assunto é como segue:

"Que desde a promulgaçom da Lei 52/2007, de 26 de diciembre, pola que se reconhecen e ampliam direitos e se estabelecem medidas em favor de quem padeceu perseguiçom ou violência durante a guerra civil e a ditadura, mais conhecida por “Lei da Memória Histórica”, a Associaçom Cultural Almuinha tem solicitado do Arcebispado de Compostela que gestionara ante os sacerdotes correspondentes a retirada dos ilegítimos símbolos franquistas que continuam a estar expostos no exterior dos templos de Marim.

Embora nos remitiram resposta acusando teres recebido, por parte do Vice-chanceler Secretário do Arcebispado, a nossa solicitude, onde indica que será valorado para posteriormente comunicar-nos as suas conclusons ao respeito, todavia nom temos recebido ditas conclusons.

Ademais sendo testemunhas de que os presidentes da Câmaras Municipais dos Concelhos de Cuntis e Caldas de Reis têm assumido como próprias idénticas reivindicaçons tornando vivo o espírito da Lei referida e obtendo resposta positiva das autoridades eclesiásticas,"

Tras o que solicitamos:

"Que tenha a bem intemediar ante o Arcebispado para conseguir o fim proposto de retirada da simbologia pre-constitucional nomeadamente pensando no sufrimento que, todavía hoje, está a provocar a sua contemplaçom nas paredes das Igrejas de Marim, por parte de quem garda nas suas consciências a lembrança do sufrimento em si próprio, ou nos seus achegados, das consequências da barbárie violenta dos que se erguerom ilegalmente contra a orde jurídica-institucional vigorante na altura e mantiveram a Galiza em um estado de guerra e posterior falta de liberdades, opressom e terror.

A nossa Associaçom oferece a sua colaboraçom à instituiçom que preside para, se o precisar, efectivizar quanto antes umha resposta positiva da Igreja Católica.

Marim, a 18 de junho de 2009"

junho 10, 2009

APOIAMOS MARCHA ANTI-ENCE


A A.C. Almuinha fai público o apoio da nossa associaçom à Marcha convocada pola Asociación pola Defensa da Ría (APDR) para este sábado día 13 de junho, e que partirá às 19:30 desde a Alameda de Marim.

Como cada ano, a sociedade voltará sair à rua a manifestar a disconformidade da inmensa maioría da cidadania com a ubicaçom da factoría no meio da ria e para reclamar o seu peche. Se a Marcha do ano passado veu marcada pola concessom da Autorizaçom Ambiental Integrada (AAI) ao complexo ENCE-ELNOSA, este ano vem marcada polo troco de governo da Junta e a nova situaçom.

Se bem o anterior governo galego deixou bastante que desejar à hora de adoptar medidas reais e efectivas de cara a conseguir que ENCE saia de Lourizám, com a chegada ao governo do Partido Popular (PP), a situaçom resulta quando menos preocupante, posto que a única soluçom que proponhem é o traslado da fábrica dentro da comarca, à paróquia de Marcom, o qual nos parece inaceitável.









Por todo isto, a sociedade marinense tem o dever de sair à rua este sábado mais umha vez para expresar o desejo da ampla maioría da populaçom, que nom é outro que a fábrica desapareza de Lourizám, a regeneraçom da ria, e que esta seja empregada para fomentar outro tipo de emprego e usos em consonáncia com o meio ambiente e com os interesses da maioría da populaçom.


A mobilizaçom é mais precisa ca nunca, posto que nem a própria empresa tem já expectativas de permanéncia na ria num futuro próximo, polo que já estám adicándo-se a investir recursos em outra das suas fábricas, polo que umha resposta forte da sociedade o que provocará será confirmar-lhes aos gestores da fábrica, assi como ao governo galego, que nom queremos esta fábrica em Lourizám. Por todo isto, fazemos um chamamento à mobilizaçom e à participaçom na Marcha, assi como exigimos o feche inmediato da factoria.