dezembro 22, 2018

O Apalpador 2018

O Apalpador visitará Marín o domingo 30 de decembro!

A A.C. Almuinha, A.C.D. Gharaboto e a Asociación Marinense de Artesáns estamos a organizar a chegada do Apalpador a nosa vila, que terá lugar o domingo 30 de decembro. A partir das 17:00h. percorrerá as rúas de Marín acompañado do seu grupo de músicos (Os de Marín), achegándose á rapazada e repartindo doces. Ás 18:30h. chegará á carpa da Feira de Artesanía, que se atopa na Alameda Rosalía de Castro, onde fará entrega dos premios do IV Concurso de Debuxos "Debuxando ao Apalpador".

Mais para aliviar a espera, onte inauguramos o posto do Apalpador na carpa da Feira de Artesanía, onde instalamos unha imaxe xigante do carboeiro para facer un Photocall, e quen o desexe poderá tirarse unha foto facendo de Apalpador, así como darse unha volta pola Feira, onde seguro atoparán cousas ben interesantes para os agasallos destas festas.

E por outra banda, organizamos o IV Concurso de debuxo "Debuxando o Apalpador", cuxas bases engadimos a continuación, e animamos aos/ás máis pequenos/as a que participen e leven os seus traballos á carpa até o día 30 de decembro ás 12. O ano pasado participaron máis de 60 nenos/as, así que este ano agardamos que sexan máis!

Bases do IV Concurso "Debuxando ao Apalpador":

1.­ Os debuxos deberán versar sobre a figura do Apalpador, e levará un lema escrito en galego.
2.­ Haberá tres categorías. Unha primeira para nenos/as entre 3 e 5 anos. A segunda para nenos/as con idades entre 6 e 8. E a terceira será para nenos/as entre 9 e 12 anos.
3.­ Para poder participar no concurso, cada neno/a deberá presentar un deseño orixinal, con calquera material ou técnica, relativo á figura do Apalpador. O deseño será presentado nunha folla de papel ou cartolina de tamaño A4.
4.­ Entregaranse 9 premios, para os tres mellores debuxos de cada categoría.
5.­ Os traballos terán que ser entregados como data tope o 30 de decembro ás 12 na Carpa da Feira de Artesanía, na Alameda Rosalía de Castro de Marín. Os debuxos serán expostos na Carpa desde o momento da entrega.
6.­ Para identificar os traballos, na parte de atrás dos debuxos deberá constar o nome e apelidos do autor, teléfono de contacto, así como a súa idade.
7.­ O xurado estará composto por 4 persoas: unha da A.C.D. O Gharaboto, outra da A.C.Almuinha, outra da Asociación de Artesáns de Marín e o propio Apalpador.
8.­ O veredicto do xurado darase a coñecer e os premios entregados polo propio Apalpador o día 30 de decembro ás 18:30h. na Carpa da Feira de Artesanía, na Alameda Rosalía de Castro de Marín.
9.­ A participación no concurso supón a autorización expresa para a difusión das imaxes.10.­ A participación no concurso supón a aceptación de todas e cada unha das presentes bases, así como o criterio das 3 entidades organizadoras da actividade na resolución de calquera cuestión non prevista nestas bases.

outubro 31, 2018

Presentación "A casa que me mora", de Ángel Estévez Casal

O vindeiro venres 2 de novembro a A.C. Almuinha presenta o libro de poemas "A casa que me mora", do poeta de Seixo Ángel Estévez Casal. O acto terá lugar no Museo Manuel Torres de Marín a partir das 20:30h.

Ángel Estévez Casal traballou como perito agrícola en diferentes zonas de Galiza e ao longo da súa vida foi escribindo poemas. Tras a súa xubilación recolleu aqueles escritos, que foi corrixindo e ordenando, e agora, aos seus 82 anos, publica o seu primeiro libro "A casa que me mora", con máis de 50 poemas.

No acto intervirán, amais do autor, José Antonio Pazos (mestre do colexio O Sequelo), Lara Dopazo (poeta), e proxectarase un poema do libro que foi musicado por José Iglesias.

junho 26, 2018

Presentación "O Diario Galego"

Hoxe terá lugar a presentación de "O Diario Galego", un proxecto xornalístico en papel na nosa lingua, tan necesario dada a situación do galego.

No acto, que comezará ás 20:30h. na Biblioteca de Marín, participarán Mariola González Fernández (activista cultural), José Antonio Pazos (mestre do Sequelo) e Xoán Colazo (Consello de Administración de Sermos Galiza).

Principios de "O Diario Galego":

O DIARIO GALEGO defenderá os intereses galegos e estará escrito na lingua propia de Galiza. Será un medio de comunicación nacional, profesional e colaborativo que proporcionará información xeral.

O DIARIO GALEGO aspira a formular temas que se botan en falta na axenda mediática do país, como poden ser traballo, cultura, ecoloxía, feminismos, lingua, diáspora, economía, memoria, historia, dereitos e liberdades civís.

Caracterizarase por manter unha mirada construtiva cara ao desenvolvemento e a transformación económica e social da realidade galega e por contribuír a que o pobo galego conforme a súa opinión sobre información obxectiva e contrastada.

O DIARIO GALEGO propiciará o diálogo entre xeracións dirixíndose a un público cun pensamento e comportamento aberto, actual e implicado pero que non ve reflectidas na prensa convencional as súas ideas de avance social. Falará de canto lles afecta e preocupa, ou mellor, facilitará que se expresen libremente esas galegas e galegos que procuran un cambio de seu para Galiza.

O DIARIO GALEGO terá unha distribución das novas arredor de catro módulos de información (país, mundo, cultura e axenda), evitando así as seccións pechadas dos medios tradicionais. Proponse elaborar os contidos dun modo anovador neste momento: transmitindo información rigorosa baseada en datos e fontes fidedignas, co cal tratará de rachar co nesgo interesado que xeralmente lle imprimen ás novas moitos mediadores e axentes institucionais ou empresariais.

O DIARIO GALEGO distinguirá entre opinión e información, apostará porque o lector tire as súas propias conclusións, ofrecéndolle información verificada, contrastada e afastada da posverdade. Ofrecerá a interacción e o diálogo, un espazo de comunicación aberto a todo o pobo e tratando todos cantos asuntos repercutan sobre o benestar económico, social e cultural da xente de Galiza. Somos moi conscientes de que O DIARIO GALEGO parte coas limitacións propias de quen comeza sen apoios de ningunha empresa de referencia ou grupo de presión, mais tamén coa convicción de que se lograrmos que as mulleres e os homes da nosa Terra se identifiquen con el non aforrarán esforzos para que mellore e medre.

dezembro 21, 2017

Xa chega o Apalpador!!!

O día 31 o Apalpador percorrerá as rúas de Marín outro ano máis. Será pola tarde, antes de achegarse á carpa da Feira de Artesanía, na Alameda Rosalía de Castro de Marín, para entregar a partir das 18:00h. os premios do III Concurso de debuxo "Debuxando ao Apalpador".

E mentres non chega o día, a rapazada pode ir facendo a espera máis levadeira facendo debuxos do noso xigante carboeiro, e de paso participar no III Concurso de debuxo "Debuxando ...ao Apalpador".

Os debuxos teñen que entregarse na Carpa da Feira de Artesanía como data tope o 30 de decembro. Deixámosvos as bases do concurso. Ánimo e a participar, que o Apalpador está a chegar!!!

Bases do III Concurso "Debuxando ao Apalpador":

1.­ Os debuxos deberán versar sobre a figura do Apalpador, e levará un lema escrito en galego.
2.­ Haberá tres categorías. Unha primeira para nenos/as entre 3 e 5 anos. A segunda para nenos/as con idades entre 6 e 8. E a terceira será para nenos/as entre 9 e 12 anos.
3.­ Para poder participar no concurso, cada neno/a deberá presentar un deseño orixinal, con calquera material ou técnica, relativo á figura do Apalpador. O deseño será presentado nunha folla de papel ou cartolina de tamaño A4.
4.­ Entregaranse 9 premios, para os tres mellores debuxos de cada categoría.
5.­ Os traballos terán que ser entregados como data tope o 30 de decembro de 2015 na Carpa da Feira de Artesanía, na Alameda Rosalía de Castro de Marín. Os debuxos serán expostos na Carpa desde o momento da entrega.
6.­ Para identificar os traballos, na parte de atrás dos debuxos deberá constar o nome e apelidos do autor, así como a súa idade.
7.­ O xurado estará composto por 4 persoas: unha da A.C.D. O Gharaboto, outra da A.C.Almuinha, outra da Asociación de Artesáns de Marín e o propio Apalpador.
8.­ O veredicto do xurado darase a coñecer e os premios entregados polo propio Apalpador o día 31 de decembro ás 18:00h. na Carpa da Feira de Artesanía, na Alameda Rosalía de Castro de Marín.
9.­ A participación no concurso supón a autorización expresa para a difusión das imaxes.
10.­ A participación no concurso supón a aceptación de todas e cada unha das presentes bases, así como o criterio das 3 entidades organizadoras da actividade na resolución de calquera cuestión non prevista nestas bases.

abril 26, 2017

"A Arte Rupestre" - Xornadas "Francisco Carballo" de Historia de Galiza

Este vindeiro venres 28 de abril terá lugar a segunda conferencia das Xornadas "Francisco Carballo" de Historia de Galiza que estamos a organizar desde a nosa asociación. Tras abordar o Megalitismo no primeiro acto destas xornadas, desta volta o tema a tratar será "A Arte Rupestre". A conferencia terá lugar a partir das 20:30h. no Museo Manuel Torres de Marín e contaremos coas intervencións de Alia Vázquez, Miguel Carrero e Benito Vilas, investigadores das Universidades de Santiago de Compostela e de Vigo.

Con estas xornadas tratamos por unha banda de achegarnos ao noso pasado, á Historia da nosa Terra coa finalidade de coñecela e divulgala, e por outra pretendemos aportar elementos que nos permitan estar en mellor situación de comprender o noso presente, o que hoxe somos, que non é nin máis nin menos que o resultado dun longo proceso histórico. É por isto que resulta evidente que para comprender o noso presente cómpre analizar o noso pasado, a nosa Historia.

Nesta ocasión abordaremos o interesantísimo tema da Arte Rupestre, cuxa manifestación máis sobranceira son eses característicos gravados sobre pedras ou rochas coñecidos como petróglifos. Os petróglifos galegos non son un fenómeno único da nosa Terra, mais si destacan a nivel mundial pola súa riqueza.

A maioría dos petróglifos galegos foron realizados sobre granito, aínda que tamén empregouse a lousa e o xisto, e podemos distinguir dous tipos de petróglifos: naturalistas, con representacións zoomorfas, antropomorfas e de armas; e xeométricos, dos cales descoñecemos o seu significado, entre os que atopamos circulos concéntricos, labirintos (entre os que destaca o labirinto de Mogor), deseños reticulados, espirais, puntos e coviñas.

En Marín dispoñemos de abundantes exemplos de arte rupestre, destacando especialmente o petróglifo de Mogor coñecido como O Labirinto, cuxa relevancia traspasa as nosas fronteiras.

É, pois, un tema de gran interese, e para falar del contaremos coa presenza de tres persoas moi cualificadas como son Alia Vázquez, Miguel Carrero e Benito Vilas, dos cales achegamos unha breve biografía:

Alia Vázquez Martínez (Investigadora USC-GEPN AAT). Licenciatura en Historia da Arte e Máster en Arqueoloxía e Ciencias da Antigüidade pola Universidade de Santiago de Compostela. Na actualidade compaxina a realización da súa tese doutoral, onde estuda a arte rupestre ao aire libre de Galicia dende unha perspectiva espacial, coas novas tecnoloxías de representación en 3D aplicadas a arqueoloxía.

Miguel Carrero Pazos (Investigador USC-GEPN AAT). Licenciatura en Historia pola Universidade de Santiago de Compostela e Máster en Arqueoloxía e Territorio pola Universidad de Granada. Na actualidade compaxina a realización da súa tese doutoral, onde estuda o fenómeno megalítico galego dende unha perspectiva espacial, coa aplicación de ferramentas informáticas ao estudo e representación en 3D tanto da arte megalítica, como da arte rupestre da Idade do Bronce.

Benito Vilas Estévez (Investigador Universidade de Vigo). Licenciatura en Historia pola Universidade de Santiago de Compostela (USC) e Máster en Cultural Astronomy and Astrology da Universidade de Gales Trinity Saint David. Actualmente compaxina o estudo da arqueoastronomía megalítica, coa aplicación de ferramentas informáticas ao estudo e representación en 3D tanto da arte megalítica, como da arte rupestre da Idade do Bronce.
A maiores proxectarase unha curtametraxe tremendamente interesante realizada polo arqueólogo Lukas Santiago, na que recolle o achádego dun novo petróglifo en Campo Lameiro e o proceso seguido para a súa análise e estudo.

Despois do bo sabor de boca que deixou a primeira conferencia destas Xornadas, simplemente animámosvos a que asistades a este acto co que nos achegaremos a un tema tan interesante como a arte rupestre.

março 25, 2017

Charla "O Entroido dos Quinteiros"

O vindeiro mércores 29 de marzo a A.C. Almuinha celebrará unha charla sobre o Entroido no rural de Marín dos anos corenta.

Contaremos co testimonio de Ángel Estévez, veciño de Santomé que nos relatará os recordos da sua infancia sobre as celebracións do Entroido. Tamén contaremos con Queta Molas que aportará datos sobre as celebracións na vila. A charla terá lugar no Museo Manuel Torres ás 20 horas.

O Entroido galego é unha celebración de longa tradición na cultura popular, unha festa motivo de persecución e represión nos anos de ditadura pero pese a prohibición continuouse celebrando nalgunhas zonas de rural onde se conservaron celebracións moi particulares.

Coa fin da dictadura franquista as festas de entroido transformáronse e volvéronse cada vez mais urbanas e con novas modalidades, esquecendo o Entroido máis enxebre.
 
Neste acto queremos recuperar na memoria a celebración do Entroido mais antigo de Marín xa esquecido por moitos polo que animamos a asistir e escoitar os relatos do noso veciño Ángel Estévez.

março 16, 2017

"O Megalitismo" - Xornadas "Francisco Carballo" de Historia de Galiza

O vindeiro venres 17 de marzo a A.C. Almuinha inicia o Ciclo de Conferencias "Francisco Carballo" de Historia de Galiza. Nesta primeira ocasión trataremos o tema "O megalitismo", e contaremos coa intervención do arqueólogo Juan Carlos Castro Carrera, director da Sociedade Anta de Moura S.L. O acto terá lugar no Museo Manuel Torres de Marín a partir das 20:30h.

Este ciclo de charlas de Historia de Galiza levará o nome de "Francisco Carballo". Desde a nosa asociación queremos tributarlle unha modesta homenaxe a un home que, malia non ser marinense de nacemento, permaneceu ligado a nosa vila con especial intensidade durante moitísimos anos, e que adicou unha parte moi importante da súa vida ao coñecemento da historia de Galiza e a súa difusión, polo que nos parece moi axeitado ligar o seu nome ao destas xornadas.

A historia é a ciencia que ten por obxecto o estudo do pasado das sociedades humanas, e desde a nosa asociación partimos do convencemento de que o coñecemento do noso pasado, da historia do noso pobo, constitúe un elemento imprescindíbel para a comprensión do que somos hoxe e para entender o presente no que vivimos. O que somos e todo o que nos nosos días forma parte da nosa realidade cotiá é o resultado dun proceso ao longo da historia no que interveñen multitude de elementos e factores.

O noso obxectivo con estas conferencias será aportar datos para a comprensión do noso presente, e no futuro iremos abordando diferentes temas da historia da nosa Terra. En ocasións centrarémonos en falar das distintas etapas ou épocas da Historia de Galiza, como nesta ocasión na que trataremos o período megalítico, mais noutras abordaremos acontecementos máis concretos da nosa historia.

Nesta primeira ocasión trataremos o Megalítico, período da prehistoria que podemos ubicar entre o século VI a.c. e finais do século III a.c. É unha época na que se estende a actividade da agricultura, co conseguinte proceso de sedentarización da poboación, e que deixa a súa pegada na nosa Terra a través de abundantes lugares arqueolóxicos (máis de 5000) que revelan a existencia dunha numerosa poboación moi espallada no territorio. As construcións características deste período son importantes monumentos feitos con grandes pedras, como os dolmens (ou antas) e os menhires (ou pedrafitas). En Marín temos exemplos desta época, entre os que podemos destacar a mámoa de Chan de Armada e o Menhir de Currás. Suponse que os nosos antepasados non vivían moi lonxe de onde se atopan as mámoas (estruturas funerarias), mais carecemos de pouca información ao respecto debido aos escasos restos atopados de asentamentos da época. Da información coa que contamos deriva esta famosa frase de Alonso del Real "Os habitantes do mundo megalítico morrían, pero non vivían". Na nosa terra, estas construcións deron lugar a numerosas lendas na tradición popular.

Para falar desta interesante época do noso pasado contaremos coa intervención do arqueólogo Juan Carlos Castro Carrera. Juan Carlos é Director da sociedade Anta de Moura S.L., que cofundou en 1992. Redacta, dirixe e coordina un gran número de proxectos no eido do patrimonio cultural, principalmente o arqueolóxico, relacionados con: escavación e conservación, rehabilitación, posta en valor, musealización, divulgación, planificación ou xestión. En relación co megalitismo, destacan as actuacións dirixidas de escavación e rehabilitación de distintas mámoas no Morrazo, entre elas as coñecidas Mámoa do Rei (no Lago de Castiñeiras, Vilaboa) e Chan de Armada 1 (Marín), ou máis recentemente as mámoas 1 e 3 da Tomada de Martínez, no Parque Empresarial de Castiñeiras (Bueu), finalizada en decembro de 2015. Actualmente é asesor da Fundación Lago de Castiñeiras nos temas relacionados coa arqueoloxía e en particular as mámoas: conservación, exposición, divulgación, etc.

janeiro 31, 2017

Palestra "O sistema eléctrico a debate"


"O sistema eléctrico a debate"

O vindeiro venres día 10 de febreiro a partir das 20:00h. no Museo Manuel Torres organizamos unha charla que levará por título "O sistema eléctrico a debate".

Contaremos coas intervencións de Fernando Branco Parga (Secretario de Enerxía da Federación de Industria da CIG) que nos falará do funcionamento do sistema eléctrico e da demanda dunha Tarifa Eléctrica Galega, e Xosé M. Golpe Acuña (Asesor enerxético) que dará unha explicación sobre o recibo eléctrico.

É un tema de notoria actualidade, tras as noticias que vimos recibindo desde que comezou o ano. Por unha banda, a importante suba do prezo do recibo da luz, calculado en arredor de 100 euros de media, e por outra banda, os enormes beneficios acadados polas grandes empresas do sector. Noticias de difícil dixestión para a inmensa maioría dos fogares galegos.

E mais tendo en conta que Galiza é un país produtor de enerxía. Na nosa Terra soportamos os custes sociais e ambientais de producción, exportamos electricidade a outros territorios e non recibimos ningún tipo de beneficio por isto, pois a nosa condición de País produtor e exportador non se ve reflectido nin na factura da luz nin en calquera outro concepto.

Mais por se isto fora pouco, hai escasos días milleiros de fogares galegos ficaron sen luz durante horas, e en moitos casos durante varios días, chegando a levarse por diante a vida dunha persoa. Cómpre ser razonábeis nestes casos, e ser conscientes de que as condicións climatolóxicas foron moi adversas, mais non é menos certo que as instalacións, sobre todo no rural galego, deixan moito que desexar e son manifesta e necesariamente mellorábeis.

O vivido estes pasados días en Galiza non é propio dun país de primeira.

Consideramos moi importante abordar o tema do sistema eléctrico nun acto que permita achegarnos a como funciona este sector no Estado español; por que a demanda dunha Tarifa Eléctrica Galega constitúe unha importante reivindicación de importantes sectores sociais, sindicais e políticos do noso País; como entender o recibo da luz e por que pagamos as cantidades que pagamos como consumidores/as, así como tratar a importante subida anunciada para este ano nos recibos da luz; e a falar do servizo que recibimos.

Por todo isto, e xa por último, queremos animar a que a xente asista ao acto e participe, pois é un tema de moita relevancia e actualidade. 

dezembro 27, 2016

O Apalpador 2016

O Apalpador volta a Marín!

O sábado 31 de decembro a partir das 17:00h. percorrerá as rúas de Marín acompañado dos seus músicos ("Os de Marín"), e ás 18:00h. estará na carpa da Feira de Artesanía (Alameda Rosalía de Castro) onde repartirá os premios do II Concurso de debuxo "Debuxando o Apalpador".

Organizado pola A.C. Almuinha, A.C.D. O Gharaboto e a Asociación de Artesáns Marinenses.

dezembro 17, 2016

II Concurso de Debuxo "Debuxando o Apalpador"

O Apalpador visitará Marín o vindeiro 31 de decembro!

A A.C. Almuinha, A.C.D. Gharaboto e a Asociación Marinense de Artesáns estamos a organizar a chegada do Apalpador a nosa vila, que terá lugar o vindeiro Sábado 31 de decembro. A partir das 17:00h. percorrerá as rúas de Marín acompañado do seu grupo de músicos, achegándose á rapazada e repartindo doces. Ás 18:00h. chegará á carpa da Feira de Artesanía, que se atopa na Alameda Rosalía de Castro, onde fará entrega dos premios do II Concurso de Debuxos "Debuxando ao Apalpador".

Mais para aliviar a espera, onte inauguramos o posto do Apalpador na carpa da Feira de Artesanía, onde instalamos unha imaxe xigante do carboeiro para facer un Photocall, e quen o desexe poderá tirarse unha foto facendo de Apalpador,

E por outra banda, organizamos o II Concurso de debuxo "Debuxando o Apalpador", cuxas bases engadimos a continuación, e animamos aos/ás máis pequenos/as a que participen e leven os seus traballos á carpa até o día 30 de decembro. O ano pasado participaron máis de 50 nenos/as, así que este ano agardamos que sexan máis!

Bases do I Concurso "Debuxando ao Apalpador":

1.­ Os debuxos deberán versar sobre a figura do Apalpador, e levará un lema escrito en galego.

2.­ Haberá tres categorías. Unha primeira para nenos/as entre 3 e 5 anos. A segunda para nenos/as con idades entre 6 e 8. E a terceira será para nenos/as entre 9 e 12 anos.

3.­ Para poder participar no concurso, cada neno/a deberá presentar un deseño orixinal, con calquera material ou técnica, relativo á figura do Apalpador. O deseño será presentado nunha folla de papel ou cartolina de tamaño A4.

4.­ Entregaranse 9 premios, para os tres mellores debuxos de cada categoría.

5.­ Os traballos terán que ser entregados como data tope o 30 de decembro de 2015 na Carpa da Feira de Artesanía, na Alameda Rosalía de Castro de Marín. Os debuxos serán expostos na Carpa desde o momento da entrega.

6.­ Para identificar os traballos, na parte de atrás dos debuxos deberá constar o nome e apelidos do autor, así como a súa idade.

7.­ O xurado estará composto por 4 persoas: unha da A.C.D. O Gharaboto, outra da A.C.Almuinha, outra da Asociación de Artesáns de Marín e o propio Apalpador.

8.­ O veredicto do xurado darase a coñecer e os premios entregados polo propio Apalpador o día 31 de decembro ás 18:00h. na Carpa da Feira de Artesanía, na Alameda Rosalía de Castro de Marín.

9.­ A participación no concurso supón a autorización expresa para a difusión das imaxes. 10.­ A participación no concurso supón a aceptación de todas e cada unha das presentes bases, así como o criterio das 3 entidades organizadoras da actividade na resolución de calquera cuestión non prevista nestas bases.

novembro 26, 2016

Lembrando a Francisco Carballo


Este martes día 29 de novembro a A.C. Almuinha organiza un pequeno e sinxelo acto de lembranza da figura de Francisco Carballo Carballo, coincidindo coa data do seu pasamento.

O acto terá lugar na Alameda Rosalía de Castro de Marín ás 20:00h. e consistirá nunha ofrenda floral e na lectura dunhas breves palabras coas que lembraremos, e dalgún xeito homenaxearemos, a Francisco Carballo.

Contaremos ademais coa participación do grupo “Os de Marín” que interpretarán dúas pezas: A Marcha do Antigo Reino de Galiza e o Himno Galego.

Francisco Carballo naceu en Maceda no ano 1925 e finou en Salamanca o 29 de novembro de hai 2 anos, en 2014. Escritor, profesor, historiador, sacerdote e teólogo, a súa vida estivo marcada polo seu profundo compromiso coa Terra.

Foi unha persoa moi vinculada a Marín, xa que estivo durante moitos anos no colexio San Narciso, como profesor e aínda como director do centro algún anos.

Con 16 anos foi estudar a Madrid cos Padres Paúles onde estaría 4 anos, até que marchou a Cuenca para seguir os seus estudos filosófico-teolóxicos outros 4 anos máis, e máis tarde licenciouse en Historia cun Sobresaliente pola Universidade Complutense de Madrid.

O seu forte compromiso coa Terra levouno a participar intensamente da cida cultural, relxiosa e política galega.

Foi un dos fundadores do semanario A Nosa Terra en 1977, xornal de referencia no movemento nacionalista galego e un colaborador constante en innumerábeis ámbitos.

No ano 1979 presentouse como candidato ao Senado polo BNPG e en 1981 foi condenado a 6 meses de prisión e a unha multa por calumnias á policía na obra colectiva “Historia de Galicia”

Autor dun bo número de libros, nos que tratou diferentes temáticas como os relacionados coa igrexa galega, a historia de Galiza e figuras importantes da nosa historia como Castelao, Alexandre Bóveda, Martín Sarmiento, Moncho Reboiras ou Xosé Chao.

A súa meirande producción escrita foi en galego, como non podía ser doutro xeito, debido ao seu forte compromiso con Galiza e cos seus sinais de identidade, mais tamén deixou algunha publicación en castelán.

outubro 21, 2016

Presentación "O anxo negro" de Manuel Gago

O vindeiro venres 28 de outubro a A.C. Almuinha organiza a presentación en Marín da novela de Manuel Gago "O anxo negro". O acto celebrarase no Museo Manuel Torres a partir das 20:30h. e intervirá o autor do libro. Esta será a segunda vez que temos o privilexio de contar coa presenza de Manuel Gago nun acto da A.C. Almuinha. A anterior foi aló por novembro do 2010, cando baixo o título "República de homes libres: na procura dos Lordomani" abordou o sempre interesante tema dos normandos e da súa presenza en Galiza.

Manuel Gago Mariño (Ribeira, 1976) é doutor en CC. da Información pola Universidade de Santiago de Compostela. Na actualidade, é director de culturagalega.org, o portal de divulgación cultural do Consello da Cultura Galega e profesor asociado na Facultade de CC. da Comunicación da Universidade de Santiago de Compostela, formando aos novos xornalistas na especialidade de ciberxornalismo. É editor de Capítulo Cero (www.manuelgago.org/blog), un dos blogs referentes da rede galega, no ámbito da divulgación histórica, científica, en estilos de vida, gastronomía e cultura, e por el ten recibido premios e mencións de diferentes colectivos profesionais galegos. Mantén a columna Vermello contra o mar en La Voz de Galicia e a sección As efeméridas no programa Galicia por diante da Radio Galega. 

No ámbito da difusión e investigación no ámbito arqueolóxico, Gago ten participado en proxectos como a escavación do poboado da Lanzada (2010) e ten promovido e coordinado iniciativas de arqueoloxía e comunicación pública nos sitios arqueolóxicos de Pena Furada (Coirós), Torre dos Mouros (Lira, Carnota, 2012), Castro de Mallou (Carnota, 2013), Croas de Niñóns (Ponteceso, 2013) ou As Croas de Cerqueda (Malpica, 2014, en curso). É fundador de patrimoniogalego.net, a rede social do patrimonio cultural de Galicia. 

Como ensaísta e escritor, Gago ten publicado libros con éxito de público. Nos últimos anos, é coautor do libro Rías Baixas, Gourmet Territory (2011), unha publicación destinada a presentar internacionalmente a gastronomía contemporánea do litoral sur de Galicia a un público de foodies e gourmets. En 2012 publicou, canda o arqueólogo Xurxo Ayán, o ensaio Herdeiros pola forza. Patrimonio cultural, poder e sociedade na Galicia do século XXI (2.0 Editora). No 2013 editou o libro de narrativa “Vento e Chuvia. Mitoloxía antiga de Gallaecia” (Ed. Xerais). E en 2015 Platos Rotos. Textos Gastronómicos (2003-2015), unha antoloxía da produción xornalística de Gago ao redor da relación entre viño, comida e sociedade. En 2016 foi un dos autores do libro colectivo Historia das Historias de Galicia (Xerais, 2016) e publicou a súa primeira novela: O Anxo Negro (Xerais, 2016).

SINOPSE
"A principios dos anos 80, Nicolás Bren, capitán retirado da Mariña Mercante, recibe un estraño encargo por parte dos veciños dunha parroquia montañesa da Costa da Morte: recuperar a figura roubada dunha Santa Mariña da que son moi devotos.
A investigación emprendida polo capitán, xunto cos veciños da parroquia, levaraos a transitar pola trama dun sistema corrupto e a descubrir os incribles vínculos da talla cun dos instantes decisivos da historia de Europa.
Unha novela trepidante coa que Manuel Gago se mergulla nas raíces profundas da cultura popular galega."

A HISTORIA
"Finais de 1981. Nun remoto mosteiro en ruínas desde tempos da Desamortización, unha comunidade rural coida con devoción unha pequena e escangallada imaxe de santa Mariña que ten moito que ver con eles, a súa identidade e a súa memoria. Un día, uns descoñecidos vanse facer coa imaxe da santa e desencadearán unha serie de incontrolados feitos. Nicolás Bren, un capitán da Mariña Mercante recén retirado e Andreu Meis, propietario dun bar local e contrabandista de tabaco ocasional, recibirán o encargo da parroquia para recuperar a santa. Movida por intereses que van moito máis alá do relixioso, a comunidade local enteira colaborará, non sempre con métodos legais no seu sentido contemporáneo, para recuperar a figura, intimamente conectada, dunha forma incrible, co pasado recente de boa parte das familias da parroquia. En O anxo negro un lector avisado viaxará ao longo de épocas, lugares e síntomas, descubrindo que en Galicia calquera historia encobre outras moitas. 

Esta é unha historia de moitas historias silenciadas e silenciosas: a do expolio a gran escala do patrimonio relixioso do rural galego a partir da década de 1960, a historia da Mariña Mercante, clave no devir da costa galega durante moitos anos, e a das comunidades rurais dos anos 80, esquencidas pola Administración, que deciden como sempre fixeron sobre si mesmas e de acordo coa xustiza. Pero é tamén unha novela pensada para disfrutar, para engancharse e pasar páxina a páxina querendo saber que virá logo, chea de secretos e referencias que abren numerosas posibilidades para quen queira adentrarse polas portas abertas deste relato. "

setembro 27, 2016

Únete ao Grupo de Sendeirismo A.C. Almuinha

Tras o verán, o domingo 11 de setembro o Grupo de Sendeirismo da A.C. Almuinha retomou a súa actividade cunha andaina pola Ruta da Pedra e da Auga, entre os concellos de Ribadumia e Meis (fotos: https://www.facebook.com/Grupo-de-Sendeirismo-AC-Almuinha-918714451557172/photos/?tab=album&album_id=1058389814256301).
 
Este domingo terá lugar unha nova saída, desta volta será a Ruta do Foxo do Lobo no concello de Cotobade. A saída será ás 10:00h. na entrada do aparcadoiro do porto, ao carón da Escola Naval, para dirixirnos en coches até o punto de inicio da ruta, que temos previsto comezar ás 10:30h.
 
O Sendeirismo é unha práctica que goza dunha gran popularidade nos nosos días. Cada fin de semana os camiños e montes da nosa Terra énchense de persoas desexosas de contacto coa natureza, practicar deporte e achegarse a moitos elementos, do máis diverso, propios da nosa cultura.
 
O obxectivo desta actividade é fomentar hábitos saudábeis e a práctica do deporte, o amor e o respeito pola natureza e o achegamento ás máis diversas manifestacións culturais propias do noso país, aspirando a acadar un maior coñecemento da nosa Terra.
 
O Grupo de Sendeirismo da A.C. Almuinha comezou as súas actividades no mes de marzo deste ano e xa realizou varias andainas destinadas, na súa maioría,  a todos os públicos, coa intención de iniciar aos máis cativos nesta práctica.
 
Queremos animar a todas aquelas persoas que poidan estar interesadas nesta actividade, que é totalmente de balde, a poñerse en contacto con nós, ben a través do noso correo electrónico (a.c.almuinha@gmail.com) ou ben a través de mensaxe privada polo Facebook.
 

julho 15, 2016

VIII Romaría do Día da Patria


O vindeiro sábado día 23 de xullo a A.C. Almuinha organiza a VIII Romaría do Día da Patria. Nesta ocasión celebraremos unha cea a partir das 21:00h. na taberna de Lucho (Santo Tomé de Piñeiro), que terá un prezo de 17 euros e estará amenizada con algunha intervención musical. Para asistir á cea é preciso apuntarse por correo electrónico (a.c.almuinha@gmail.com) ou por mensaxe privada no Facebook da A.C. Almuinha.

É un encontro de confraternidade ao que convidamos a todas as persoas que sintan a necesidade de que a nosa Terra sexa dona de si mesma e conte con poder de decisión real para afrontar os importantes retos da nosa sociedade nuns tempos de crise que determinan un futuro incerto para a supervivencia do noso pobo.

Desde a A.C. Almuinha, como asociación sociocultural comprometida coa realidade na que vivimos, e polo tanto co noso País, consideramos que o 25 de xullo, Día Nacional de Galiza, convírtese nun momento de especial relevancia para a reivindicación dos plenos dereitos da nosa Terra, polo que desde o nacemento da nosa asociación alá polo ano 2008 vimos organizando na nosa vila unha actividade para celebrar esta data, coa única excepción do ano pasado.

Partimos do convencemento de que o desenvolvemento integral dos povos só se acada cando se dispón dos mecanismos de decisión suficientes para poder levar a cabo políticas favorábeis ás maiorías sociais, así como que só nestas circunstancias se producen as condicións para que as expresións e manifestacións de todo tipo de calquera colectividade, incluidas por suposto as culturais, se manifesten na súa plenitude.

Animamos, pois, a todas aquelas persoas que apostan porque o pobo galego teña a capacidade de determinar libremente o seu futuro a que se apunten á cea, e a gozar dunha boa noite entre compañeiros/as, con independencia das diferentes interpretacións e plantexamentos que cada quen poida ter para acadala.

maio 30, 2016

Marcha "Móvete pola Ría"

Este sábado 4 de xuño terá lugar unha nova Marcha até a fábrica de Ence en Lourizán. Mais desta volta non será unha Marcha máis. Baixo o lema "Móvete pola Ría" esta mobilización producirase no contexto da prórroga por 60 anos que o goberno español en funcións (PP) ven de outorgarlle a Ence recentemente.

Unha decisión que, malia que o goberno español se esforza en disimular como un "trámite administrativo", non parece moi apropiada e a ninguén se lle escapa que ten un claro compoñente político, e pon de manifesto unha vez máis a estreita relación e connivencia entre o PP e a empresa pasteira.

E desde logo non é unha decisión acertada, pois a permanencia da fábrica en Lourizán hipoteca o futuro da ría e destrúe emprego. E queremos incidir especialmente na destrución de emprego, pois é un argumento repetidamente alegado pola empresa para defender a súa permanencia na ubicación actual. Destrúe emprego ao danar a ría e por conseguinte a economía pesqueira e marisqueira, e impide coa súa presenza o desenvolvemento dunha economía turística e o estabelecemento dun sector económico limpo baseado no respeito ao medio.

Que esta é unha convocatoria especial ponse de relevo tamén nas entidades convocantes. Nesta ocasión a Marcha estará convocada pola Plataforma Ence Fóra da Ría para Sempre, da que a A.C. Almuinha forma parte, e pola Federación Ecoloxista Galega (F.E.G.).

O sábado reivindicarase o traslado da fábrica de Ence fóra da nosa ría; mais tamén a fin do monocultivo de eucalipto e o establecemento dunha política forestal racional que favoreza unha explotación ordenada e sostíbel dos nosos montes; así como o saneamento integral da ría.

A Marcha partirá o vindeiro sábado 4 de xuño ás 19:30h. das Alamedas de Marín e Pontevedra, e desde a A.C. Almuinha queremos facer un chamamento á cidadanía para que apoie de xeito masivo esta convocatoria. Hai diferentes vías postas en marcha para impedir a permanencia de Ence na ría e a conseguinte destrucción da nosa ría, mais a mobilización social é un factor imprescindíbel. Sen unha resposta social contundente, na que fique ben claro que non queremos ese monstro no medio da nosa ría, a saída da empresa será máis difícil e o noso futuro máis negro.

maio 26, 2016

O Faiado de Marín, información da nosa vila

O pasado 17 de maio, Día das Letras Galegas, desde a A.C. Almuinha puxemos en marcha unha páxina de facebook de información de Marín, para falarmos de nós e das nosas cousas.

Dálle "Gústame" e acompáñanos neste novo proxecto.


maio 09, 2016

Non se pode consentir! Coidemos os nosos montes!

O pasado sábado 7 de maio desde a A.C. Almuinha organizamos un roteiro, o Roteiro polo río Lameira, quinta e última andaina desta tempada dentro do programa que bautizamos co nome "Coñecendo o noso entorno". 

Durante o percurso atopámonos cun moi desagradábel espectáculo no entorno do lago de Castiñeiras. 
 
Hai uns días tivo lugar unha proba de BTT, que comezou nun lugar moi próximo ao lago de Castiñeiras. 

Cómpre salientar, en primeiro lugar, que desde a A.C. Almuinha nos parece perfecto a organización de calquera tipo de evento deportivo na natureza, e non dubidamos de que a inmensa maioría de participantes en dita proba aman e gozan da natureza, pois esta é unha práctica deportiva na que o contacto coa natureza é particularmente intenso. 

Mais o que non é de recibo, é unha auténtica porcallada, é deixar o monte como nolo atopamos. O lugar desde onde saiu a proba estaba cheo de botellas baleiras de auga, as cintas que demarcaban o circuito polo chan e outras moitas permanecen aínda colocadas polo circuito. 

Amais disto, no descenso cara Marín atopamos un colchón atado a unha árbore, que descoñecemos se garda relación coa mencionada proba deportiva ou non, mais que en calquera caso parece que garda relación con esta práctiva deportiva e nos parece intolerábel a súa presenza, pois dá unha imaxe lamentábel.
 
Imos poñer en coñecemento do Concello de Marín esta situación para que tome as medidas oportunas, e tamén exixir un maior control por parte do Concello de Marín cando se autoriza calquera tipo de evento, sexa do tipo que sexa. Parécenos do máis mínimo sentido común que cando se utilizan unhas instalacións municipais ou a propia natureza para a realización de calquera tipo de evento, ao seu remate o lugar ten que quedar nas mesmas condicións que estaba antes da súa realización, e aí o Concello ten responsabilidade. 

Xuntamos varias fotos que acreditan a nosa denuncia.

maio 08, 2016

VII Festa da Lingua!!!

Entre os días 12 e 14 de maio terá lugar a VII Festa da Lingua, organizada pola A.C. Almuinha coa colaboración da A.F. Pousos da Area e a A.C.D. Gharaboto.
 
O día 17 de maio é o Día das Letras Galegas, e desde a A.C. Almuinha sempre consideramos que, se ben a celebración dun día para a nosa lingua é un puro formalismo, inútil e absurdo se non vai acompañado de actuacións coherentes o resto do ano, si que é un bo momento para manifestar o apoio e compromiso coa lingua, visibilizar o orgullo de termos unha lingua propia, e declarar o noso anhelo dun futuro digno para o galego.
 
A continuación informamos das actividades organizadas:
 
- Xoves 12 de maio - Charla "Manuel María: Literatura e Compromiso coa Terra" a cargo de Marta Dacosta (Poeta e mestra de Lingua e Literatura Galega, forma parte d@s "Amigos e Amigas da Casa-Museo Manuel María). Comezará ás 20:30h. no Museo Manuel Torres de Marín.
 
- Venres 13 de maio - Cantos de Taberna co grupo Maravallada. Ás 21:00h. na Adega da Capeleira e ás 22:00h. na Taberna La Navarra, con entrada de balde. 
 
- Sábado 14 de maio:
11:30h. Pasarrúas con Pousos da Area 
12:30h. Acto Poético-Musical na Alameda Rosalía de Castro 
· Lectura Colectiva de Poemas de Manuel María*
· Intervencións Musicais: Pousos da Area e Gharaboto

* Na lectura colectiva pode participar toda persoa que o desexe. Tan só pedimos que nolo comunique previamente para a organización do acto. 

Pousos da Area son un grupo de música tradicional de Marín que se adica á recollida e interpretación de cantares e bailes tradicionais galegos, imparte cursos de diferentes instrumentos, de canto tradicional e de artesanía, como corte e confección e elaboración de colares. Son os organizadores do Serán Pousos da Area, que ten lugar en Marín e este ano cumpriu a súa terceira edición.

Gharaboto é unha asociación cultural e deportiva de Marín. Entre as súas actividades destacan a promoción dos xogos tradicionais e a música tradicional. Como agrupación musical son máis coñecidos como "Os de Marín".
 
O POVO que deixa perder a súa palabra
creada, herdada, usada, revelada, 
aquela que lle é propia e singular;
a que é unicamente súa,
está empobrecendo o mundo
e perpetrando o seu propio xenocidio.

MANUEL MARÍA

Cantos de Taberna con Maravallada!!!

A A.C. Almuinha organiza unha actividade de Cantos de Taberna en Marín, da man do grupo Maravallada, dentro dos actos que estamos a programar para a VII Festa da Lingua.

Até non hai moito tempo era do máis normal entrar nunha taberna de Marín e atopar xente compartindo momentos mentres cantaba cancións populares. Esta tradicion, por desgraza, foise perdendo nos últimos tempos e nós queremos rememorar esas experiencias, e ogallá actividades como estas, que se organizan en diferentes localidades da nosa Terra serviran para recuperar unha tradición do máis fermosa.
 
Xa sabedes, o venres día 13 de maio vinde con ganas de cantar. Ás 21:00h. estarán na Adega da Capeleira, e ás 22:00h. na Taberna La Navarra. A entrada é de balde.
 
Nesta primeira ocasión contaremos coa presenza de Maravallada. Maravallada é un grupo dunha gran calidade cun repertorio baseado na música tradicional, afincado en Pontevedra, e está composto por cinco mozas e tres mozos.
 
Agardámosvos!

Charla "Manuel María: Literatura e Compromiso coa Terra"

O vindeiro xoves 12 de maio ás 20:30h. a A.C. Almuinha celebrará unha charla no Museo Manuel Torres na que abordaremos a figura de Manuel María, o escritor homenaxeado este ano no Día das Letras Galegas, nun acto que terá por título: "Manuel María: Literatura e Compromiso coa Terra".

Amais da súa faceta literaria, a vida de Manuel María destaca polo seu firme compromiso con Galiza.

Neste acto, enmarcado no programa de actividades da VII Festa da Lingua que organizamos desde a nosa asociación, contaremos coa participación de Marta Dacosta, poeta e profesora de Lingua e Literatura Galega no ensino medio, que fai parte do grupo de "Amigas e Amigos da Casa-Museo Manuel María".

Marta Dacosta Alonso naceu en Vigo o 29 de setembro de 1966. Licenciada en 1989 en filoloxía galego-portuguesa. É profesora de lingua e literatura galegas no ensino medio. Moitos dos seus poemas foron publicados en revistas como Olisbos, Dorna, Festa da Palabra Silenciada, en diversas publicacións colectivas e antoloxías...

Aínda que na súa producción literaria destaca a poesía ten tamén publicado algúns ensaios sobre lingua e literatura.

Comeza a publicar en revistas como Congostra, Olisbos ou A Peneira, diario no que obtén o I premio de poesía xuvenil en 1986, ou Lúa nova, da Asociación Cultural Rosalía Castro de Cornellá, onde gañou o III premio Rosalía Castro.

O seu primeiro libro veu a luz en 1994, Crear o mar en Compostela, e desde entón ten publicado case unha ducia de libros.

Recibiu numerosos premios como o Premio de Poesía O Grelo (1993), Premio Miguel González Garcés (1995), Premio de Poesía Martín Códax (1997), Accésit Premio Esquío de Poesía (1999), Premio Johán Carballeira de Poesía (2013) e o I Premio de Poesía Figurante (2013).

Na actualidade exerce como docente do ensino medio, adícase á actividade sindical na CIG, forma parte da directiva da AELG.